Avilés, El Franco, Uviéu y Ayer son les próximes paraes de la xira de Dixebra

Tres dar siete conciertos yá y recién llegaos d’Ibiza -onde amás d’actuar, Xune Elipe dio una charra alredor de la llingua asturiana-, continúa la xira d’Ente la niebla, el discu nuevu de la mítica banda de rock astur Dixebra. Esti fin de selmana toquen el vienres 12 a la una de la madrugada nel Festival La Mar de Ruido d’Avilés que se fai nel Parque del Muelle y la medianueche del domingu 14 nes fiestes d’A Braña, parroquia asitiada nel conceyu d’El Franco. En dos selmanes vuelven a Uviéu p’actuar el xueves 25 dende les 20h nel Kuivi PopUp d’Uviéu xunto a Skama la Rede y Ochobre; y pel momentu tamién ta confirmáu el conciertu del 10 de setiembre na Nueche Celta d’Ayer, que torna a facese en Soto dempués de 16 años y na que tamién van tocar Llan de Cubel, Felpeyu y la Banda Gaites El Gumial.

El 22 d’abril Dixebra asoleyó en formatu físicu y en toles plataformes dixitales la so obra más ambiciosa, ‘Ente la niebla’. El míticu grupu de rock astur regresa con venti cantares y un llibru de 112 páxines onde too ta cuidao hasta l’últimu detalle. La diversidá de soníos –rock, reggae, punk ska, folk, funk, metal….- de la música tien el puntu d’alcuentru nunes lletres que tienen un mesmu conceptu: homenaxear al pasáu, presente y futuru de les clases populares asturianes.

«La memoria colectiva de les clases populares asturianes ye una historia de compromisu, llucha y sacrificiu qu’abarcó tol sieglu XX, pero que col posmodernismu y la globalización capitalista foi amatagando nesti mileniu nuevu. Sicasí, hai esperanza, pente la niebla tovía pueden albidrase solombres que nos recuerden quién fuimos y tán dispuestes a facese lluz». Esta publicación que fizo’l grupu nes sos redes sociales l’añu pasáu resume perfectamente la esencia d’esti trabayu enllenu d’historia, señaldá y, a la par, enfotu. Nun ye casualidá, Dixebra nacieron cola reconversión industrial y lleven 35 años cantando-y a la llucha obrera, a la solidaridá, a un país; a una parte de la nuestra identidá como asturianes y asturianos que, pesie a tol desmantelamientu d’Asturies y tola individualización de la sociedá, entá se resiste a morrer.

Asina ye como ‘Ente la niebla’ entama con dos pieces -el cantar homónimu y “Soi”- y acaba con “El saltu final”; tres canciones que sinteticen la idea del llibru-CD. Pel mediu, los cantares van percorriendo cronolóxicamente distintos fechos de les clases populares: les emigraciones de finales del sieglu XIX y primeros del XX, la Revolución d’Ochobre, la guerra n’Asturies del 36-37, la represión y la resistencia nel franquismu, la güelgona, les migraciones de los años 50, conflictos llaborales como’l d’Ike, Naval Xixón y Duro Felguera, la traición y la corrupción de los sindicatos mayoritarios… Too ello con una mirada propia; cantando a «lo que foi esta tierra y poniendo música a esa herencia cultural que malapenes sobrevive na nublina del olvidu».

Un trabayu integral y colectivu

‘Ente la niebla’ ye muncho más que canciones. Música, lliteratura, ilustraciones y fotografía histórica axúntense nun trabayu conceptual que tien tamién un calter colectivu. Historiadores como Rubén Vega, Faustino Zapico o Rafa R. Valdés, l’arqueóloga Irene Faza Aladro, los escritores Pablo Texón, Xosé Miguel Suárez y Marta Mori o l’activista llinguística Penélope Miranda, amás de Xune Elipe y Primi Abella -cantante y guitarrista de Dixebra-, son autores de los testos del llibru, que traten diversos aspectos de la relevancia y significación del movimientu obreru asturianu y de les clases trabayadores y populares en xeneral.

L’aspectu gráficu tamién ta cuidáu dafechu, con más de venti ilustraciones esclusives feches por cuatro destacaos dibuxantes asturianos: Miguel Solís Santos, Alfonso Zapico, Nieves González y Ruma Barbero, qu’aporten a caúna de les canciones la so visión particular dende’l puntu de vista estéticu. A ello hai qu’añader la cincuentena de fotografíes históriques de toles époques nes que se desarrollen les histories de cada cantar.

Nel terrén estrictamente musical, contaron cola ayuda de músicos como Toño Gómez (trombón), Rubén Bada (violín), José Manuel Tejedor (gaita), Sandra Lusquiños (voz), Pablo Sánchez (coros), Javier Tejedor (acordión), Lluci Palomares (voz) o Bárbara González-Quevedo (voz). Too ello pa dar forma bayura de soníos que sigue la filosofía musical dixebriega. En definitiva, ‘Ente la niebla’ son música, pallabres y imáxenes que desendolquen un exerciciu de memoria colectiva sobre la evolución histórica de la clase obrera asturiana; amás de toa una reflexón sobre’l pasáu, el presente y el futuru del Pueblu Asturianu.

Mercar productos de Dixebra en musicasturiana.com