Consumu dixital de música asturiana: realidaes y oportunidaes

La música del país va adaptándose adulces a unes plataformes dixitales que posibiliten aportar a nuevos públicos per tol mundu.

Internet foi la enfermedá y la cura de la industria de la música grabada. Si a primeros d’esti sieglu, veíemos como les descargues illegales amenorgaben fondamente les cifres de ventes de CDs y la facturación del sector; nos últimos años vemos como les plataformes d’escucha per streaming (Spotify, YouTube, Apple Music…) y de venta dixital (iTunes, Amazon Music, Google Play…), supunxeron la recuperación de la facturación a nivel mundial. En 2019 la industria de la música grabada nel Estáu español facturó un total de 296,4 millones -un 22,5% más que l’añu anterior, siguiendo la tendencia de recuperación que lleva dándose dende 2014-. D’esta cifra, un 75,3% (223,3 millones) vien del consumu dixital -sobre manera de los servicios de suscripción de pagu-, y el restante 24,7% de les ventes físiques.

Los datos son claros, pero hai munches variables a tener en cuenta porque non tolos estilos de música tienen el mesmu tipu de consumu y la música asturiana ye un exemplu d’ello. Acordies a les cifres proporcionaes por musicasturiana.com -la principal plataforma de venta física y dixital de música del país, con un catálogu de cerca 300 referencies-, en 2019 la venta física supunxo un 58,32% de la facturación y la dixital un 41,68%. Ye una tendencia distinta a la que se ta dando internacionalmente y que se pue esplicar atendiendo a que nun hai un gran consumu de música asturiana nes plataformes dixitales y a los menores ingresos unitarios que xeneren estes plataformes. Por esclariar esto últimu; si cola venta de 1 CD físicu suel facturase 12 €, p’algamar esi mesmu importe en formatu dixital hai que tener aproximadamente 3.500 reproducciones nuna plataforma de suscripción de pagu como Spotify Premium y 15.000 nuna plataforma gratuita como YouTube

Pesie a qu’económicamente esta revolución dixital supón una diferencia d’ingresos mui grande pa la música asturiana y, de primeres, pue facese la llectura de qu’estes plataformes perxudiquen, ye necesario mirar a llargu plazu. Hai qu’entender que’l consumu dixital de música ye imparable y que va siguir medrando, polo que toca aprovechar les ventaxes que xenera. Dalgunes d’elles son mui amañoses pa enfrentase a dellos retos que tien la nuestra escena como son los d’aumentar audiencia ente les xeneraciones más moces, algamar mayor repercusión internacional, xenerar más fontes d’ingresos y llegar a nuevos públicos a los qu’anguaño nun se ta aportando namás cola venta física nin cola música en vivo. Les plataformes dixitales son unes bones aliaes pa que’l son d’esti país s’esparda y tolos axentes implicaos -artistes, discográfiques, distribuidores, axencies de contratación, instituciones, públicu, medios..-, podemos emburriar p’adaptamos a esta nueva realidá y facer que’l consumu dixital de música asturiana xuegue más y meyor a favor d’esta escena.

¿Quién ta consumiendo música asturiana en formatu dixital?

Nestos gráficos esbillamos les principales característiques de consumu dixital de música asturiana. Los datos tán proporcionaos por musicasturiana.com acordies al catálogu qu’alministra en formatu dixital (290 referencies en 72 plataformes dixitales de tol mundu) y a un periodu anual (del 19 de payares de 2019 a 19 de payares de 2020). Estes cifres reflexen que nesti tiempu hubo cuasi cinco millones de reproducciones en plataformes de streaming y cerca de 400 referencies vendíes en formatu dixital; que’l 50% de los consumidores de música asturiana tien ente 28 y 44 años; y que sintieron música del país en 117 países, anque la mayor parte de les reproducciones aporten sobre manera dende Asturies.

“El consumu dixital de música ye imparable y va siguir medrando, polo qu’hai qu’adaptase a él”

“Dalgunes oportunidaes que xeneren les plataformes dixitales son les d’aportar a nuevos públicos, algamar mayor repercusión internacional y xenerar más fontes d’ingresos”

“Pa facturar 12 € hai que tener aproximadamente 3.500 reproducciones en Spotify Premium o 15.000 en YouTube”

Dexa un comentariu