El Conciertu d’Ígor Medio yá ta en YouTube

El 4 de mayu cellebróse El Conciertu d’Ígor Medio dientro de la programación de la 43 Selmana de les Lletres Asturianes que la Conseyería de Cultura, Política Llingüística y Turismu dedicó a Ígor Medio Tuya (1972-2006), el que fora ún de los fundadores de Felpeyu y dibuxante y guionista de cómics. Nesi conciertu históricu y mui emotivu actuaron Felpeyu acompañaos de más de quince músicos. TPA grabó y emitió esti espectáculu únicu y agora pue vese en YouTube gracies a la canal Folk en la red.

Un teatru de la Llaboral enllenu acoyó l’actu principal de la 43 Selmana de les Lletres: El Conciertu d’Igor Medio. Felpeyu xunto con, ente otros, componentes de Tuenda, DRD, La Bandina’l Tombo y Corquiéu, acompañaos de José Manuel Tejedor a la gaita; Mapi Quintana a la voz; Bree Delian, Xuan Nel Espósito y Félix Castro al cordión; Alberto Sánchez y Isidro Suárez a la flauta; Alberto Ablanedo al bouzuqui; Toño Gómez al vigulín y Xel Pereda a la guitarra y voz; xubieron al escenariu pa facer «una celebración de l’amistá y del ciñu pola música asturiana, esencia de lo que yera Ígor», como declaró a MUSICASTURIANA.COM Ruma Barbero, tamién fundador de Felpeyu y responsable de la programación musical d’esta edición 2022 de la Selmana de les Lletres Asturianes.

Una actividá d’esti calter, con un respaldu masivu de públicu y reforzada pola emisión televisiva d’ella, amuesa la importancia que tien la música como pegoyu fundamental dientro de les lletres asturianes y como ferramienta amañosa de normalización llingüística. Amás agora, gracies a que Folk en la Red xubió’l conciertu a la so canal de YouTube, esta actuación pue vese dende cualquier llugar del mundu.

Mercar discos en musicasturiana.com nos que tocó Ígor Medio