El Teatru Filarmónica acueye esti vienres la gala de los Premios AMAS

Los Premios AMAS 2024 celebren esti vienres 23 de febreru la gala d’entrega de los premios. A les 19.30h nel Teatru Filarmónica d’Uviéu acueye esti eventu nel que van escoyese los premiaos ente los 84 artistes nominaos. D’ellos, diecinueve tán rellacionaos cola música n’asturianu y/o de raigañu y hai un total de ventidós categoríes de les qu’en diez hai presencia d’artistes que participen d’escena.

Como cada añu, les estayes nes que más nominaciones hai pa la música d’espresión asturiana son les venceyaes a la música folk. Nesti sen, esti añu tán nominaos a Mejor Disco Folk los grupos Tever con Suañu de gaita, Antón Menchaca con Los díes contaos, 6 Riales con Sutripar y La Bonturné con A Contraforga. Na estaya de Mejor Canción Folk los escoyíos pol xuráu son Rodrigo Cuevas con “¿CÓMO YE?!”, Guieldu con “Perdayuri“, Pandereteros d’Anguaño con “Sociedá de Consumu” y Fontoria con “La Partida“. Na estaya de Gaita, tán les bandes de gaites de Magüeta (Xixón), Conceyu Llangréu, Villa y Condáu de Noreña y Ribeseya.

Na Mejor Canción Otras Escenas ta nomináu Haim Álvarez con “Esconsueñu” y en Mejor Disco Otras Escenas ta Mapi Quintana con Música pa tornar páxaros. En cuantes a instrumentistes, tán Susana Gudin de Taranus na categoría de Voz; y María José Hevia (percusiones) n’Otros Instrumentos. Tamién ta Espantayu na estaya d’Artista Revelación, Algaire en Mejor Videoclip con “Coral y Maera” y Desakato -que cantaben dellos temes n’asturianu- tán nominaos na estaya de Directo l’añu que dexaron los escenarios.

Mercar discos d’artistes nominaos a los premios AMAS 2024

Dexa un comentariu

X