Los Fayeos de Mayo, el meyor cantar de la historia de la música asturiana

Dalguna de les personalidaes que participaron nel xuráu del Top 25 n’ast espliquen lo que significó y significa esi tema pa ellos.

El tema del grupu Felpeyu «Los fayeos de mayo» ye’l meyor de la historia de la música asturiana, según la encuesta fecha pola Radio del Principáu d’Asturies (RPA). La emisora pública emitió a lo llargo de la Selmana de les Lletres de 2018 l’espaciu Top 25 n’ast, producíu por Goxe Producciones y onde se dieron a conocer los venticinco temes más votaos por un xuráu de más de trenta personalidaes del mundu de la cultura asturiana –académicos, filólogos, músicos, escritores, actores, promotores, xestores culturales y profesores universitarios–. D’una primer esbilla salieron doscientos cantares de la que los venticinco que se sintieron en RPA foron los más votaos. 

Dalguna de les personalidaes que participaron nel xuráu d’esti Top 25 n’ast falen agora pal Anuariu de la Música Asturiana esplicando lo que significó y significa esi tema pa ellos.

«Nun m’alcuerdo de la primer vez que senti esti cantar; de xuru que foi en casa col discu entá caliente, pero d’un tiempu p’acá acompáñame en tolos viaxes que faigo en coche. Préstame tanto la voz d’Igor perriba d’esa melodía que soi a cantar magar que desafino, y muncho; pero nun me da más porque voi aportar, como l’andarina, a los mios fayeos pa ser quien quiero ser. Nun me choca que saliere escoyíu porque la lletra ye una maraviya, un cantu a esti país de muga y lluz, a la persona y los sos enfotos, al porvenir»

María Xosé Rodríguez, xestora cultural.

«Ye un cantar de señaldá, un dexase tarazar polo que pudo ser y nun foi y, al tiempu, concebir eso como una forma de guapura. Ye un exerciciu d’autoubicación nel mundu de manera tanto individual como colectiva»

Pablo Texón, escritor.

«Pa min ye posiblemente la meyor síntesis de la historia recién de la música folk fecha n’Asturies. Paezme ún d’esos temes redondos, cuidaos, contundentes, tanto nel planu llíricu como musical. El reflexu d’una sentimentalidá colectiva, la d’un pueblu asturianu somorguiáu nun inevitable procesu de cambiu, pero que sigue viendo nos sos paisaxes y na so particular concepción del tiempu les sos señes identitaries más potentes. Personalmente, creo qu’algamó merecidamente’l so reconocimientu como meyor cantar n’asturianu al ser el cumal d’una de les obres más completes que dio la música asturiana nos últimos venti años: el discu ‘Yá!’ del grupu Felpeyu»

Andrea Joglar, gaitera.

«A pesar del títulu, ye un cantar iverniegu, de primavera proyectada nel cristal d’una xelada. Sígueme cuando s’acaba’l gas butano y queda la casa fría, dame calorín y llévame guapamente pelo telúrico a lo emocional. Depués xubo al monte en mayu y nin m’alcuerdo»

Pablo X. Suárez, escritor.

«Esti cantar ye un paséu al atapecer, un viaxe nel tiempu y nel espaciu. Ye la bifurcación ente cuerpu y alma, ente’l vivir ensin ser sensatos col presente, y siguir viviendo nel abellugu de los díes eternos onde too tien sentíu. Queda la esperanza del movimientu cíclicu: ‘Llevóme la vida entera regresar a la to vera’»

Pablo Quiroga, xestor cultural.

«El tema describe a la perfección la necesidá que nos apodera a los que vivimos na ciudá d’asomanos a la naturaleza pa entrar en contactu col pasu de les estaciones, pa tomar contactu, d’esta miente, col yo más fondu, el más alloláu de les mázcares sociales, el que s’alimenta, a partes iguales, de decepción y señardá»

Marta Mori, escritora y vicepresidenta de l’ALLA.  

«Yo nun tengo historia con esti cantar, nunca fui una escuchante constante de música folk. En realidá, la primer vez qu’escuche esti cantar foi pa facer la llista. Púnxime a escuchala, porque muncha xente me falara d’ella a lo llargo d’años; nun ye d’estrañar, tien un estribillu bien guapu y prestosísimu pa cantar como toa canción bien fecha»

Mapi Quintana, cantante.

«Con esos versos que remiten d’una manera despistada a la escena final de ‘Pickpocket’, del maestru Robert Bresson: “llevóme la vida entera / regresar a la to vera”, el cantar xenera una emoción modesta, doméstica –y, por eso, universal y eterna–, que nos esplica como si fueren unes llinies sacaes de la nuestra autobiografía»

Ramón Lluis Bande, cineasta.

«Nun m’estraña que saliere escoyíu porque ye un tema perfectu. Evidentemente, pesa muncho la emoción que da sentir cantar a Ígor, pero too na pieza encaxa. Primero, la poesía de la lletra, con esa andarina vistida de sol y orbayu, el verdor de los fayeos cola imaxe del alba riscando d’esmeralda… Y depués la música, onde siempre me prestaron muncho les frases de gaita de Diego Pangua, con un solu mui bien construyíu y que va mui bien como contrapuntu a la voz d’Ígor»

Xosé Miguel Suárez, filólogu.

«Ye un gran cantar. L’estrañu equilibriu de la lletra perfectamente curiada con una melodía sabia, provoquen una inmediata señaldá que nun sabes muncho bien ónde asitiar. Nun se canta equí lo perdío sinón lo que nunca se tuvo y quiciás se tendrá. Un gran cantar que, como tolos que son grandes, ta fechu con frebes d’eternidá»

Xuan Bello, escritor
DAMIÁN BARREIRO. Artículu publicáu orixinalmente nel Anuariu de la Música Asturiana 2018

Sienti la compilación del Top25 n’ast

Dexa un comentariu

X