Anuariu 2012

L’Editorial nesta ocasión titúlase «Tiempu de nosotros» y nél fálase de cómo golpió la crisis al sector musical del país y faise una petición: «les fiestes de los nuestros pueblos y ciudaes, los ciclos y muestres de les alministraciones locales y autonómica, los programes de los medios de comunicación públicos asturianos… tienen d’empapase de los sones y proyectos de los nuestros músicos», y ello porque ye ún de los sectores más afectaos pola situación provocada pola crisis qu’españó nel añu 2008.

 

En cuantes a los conteníos, destaquen: «Polítiques musicales y alministración autonómica», «La música tradicional en tiempos escuros» o «Conciertos que baxen, idees que nacen»; les entrevistes a Ta Fechu, La Tarrancha o Pablo Canalís; o les cróniques sobre’l Premiu al Meyor Cantar 2012 y el festival I Sol Celta d’Avilés; amás d’un reportaxe fotográficu sobre’l XXV Aniversariu de Dixebra. L’Anuariu zárrase, como ye vezu, cola sección Collecha, onde apaecen les producciones del añu 2012, diecisiete en total.

 

El volume compleméntase con un discu onde se recueyen muestres de lo meyor qu’ufiertó’l 2012, con ventidós cortes repartíos n’estilos como la tonada, el folk, el rock, les bandes de gaites o la canción d’autor, con artistes y grupos como Mariluz Cristóbal Caunedo, Marisa Valle Roso, Tuenda, Ta Fechu, Tejedor, Toli Morilla, Sambre o Fala Non Caduca.

       

Ente los collaboradores d’esti númberu hai firmes como les de Llorián García, Xosé Ambás, Tania Cascudo, Xandru Martino, Ivan G. Fernández, Xicu Ariza, Xune Elipe, Ignaciu Llope o Adolfo Camilo Díaz.

X