Anuariu 2013

L’Editorial nesta ocasión titúlase «Consumir música asturiana» y nél fálase de la baxada bultable de producciones discográfiques y de como la solución «pasa inevitablemente por un mayor compromisu del poder públicu autonómicu, qu’entienda a la música asturiana non como un hobby (…) o un productu esclusivamente destináu al ociu, sinón como un posible campu  d’actividá económica estable», amás de que los músicos tienen que ser conscientes del so papel nun dexando que la crisis amenorgue la so creatividá y productividá.

 

En cuantes a los conteníos, destaquen: «La Noite Celta de Porcía. Trenta años de música, vida y tradición», «(Sobre)Viviendo de la música» o «Lews tierres altes de la Celtia del Sur»; les entrevistes a Pablo Carrera o Misiva; o les cróniques sobre’l Premiu al Meyor Cantar 2013, el festival II Sol Celta d’Avilés o l’Arcu Atlánticu de Xixón; amás d’un reportaxe fotográficu sobre’l discu Tiempos modernos de Dixebra. L’Anuariu zárrase, como ye vezu, cola sección Collecha, onde apaecen les producciones del añu 2013, trenta y tres en total.

 

El volume compleméntase con un discu onde se recueyen muestres de lo meyor qu’ufiertó’l 2013, con diecinueve cortes repartíos n’estilos como la tonada, el folk, el rock, les bandes de gaites o la canción d’autor, con artistes y grupos como Fernando Valle Roso, El Cantu la Vara, Herbamora, Xera, Silvia Quesada, Dixebra, Misiva o Petit Pop.

 

Ente los collaboradores d’esti númberu hai firmes como les de Toli Morilla, Lisardo Lombardía, Damián Barreiro, Miguel Fernandi, Llorián García,  Xicu Ariza, Xune Elipe, Ignaciu Llope o Adolfo Camilo Díaz.

X