Anuariu 2014

L’Editorial nesta ocasión titúlase «La voluntá de ser y siguir de la música asturiana» y nél faise un repasu restrospectivu a lo que foron los quince primeros años de publicación del Anuariu de la Música Asturiana, destacando que: «poco de lo que se propón nellos se fixo realidá, sobre too no que se refier al deséu d’una verdadera política musical por parte del Gobiernu d’Asturies, que sigue ensin da-y l’atención afechisca a esti sector» y pídense llinies d’actuación que lleven a llograr una mayor visibilidá, tanto interior como esteriormente, estabilidá y profesionalidá.

 

En cuantes a los conteníos, destaquen: «Cómo montar un festival y nun morrer nel intentu», «Delles notes sobre los viaxes de Remis Ovalle per América y Europa» o «Música, televisión y neños: por focicos, por calamoches»; les entrevistes a Borja Baragaño, Tejedor, Skama la Rede o Conjunto Os Folkgazáis; o les cróniques sobre’l Premiu al Meyor Cantar 2013 o’l festival III Sol Celta d’Avilés; amás d’un reportaxe sobre la grabación en directo del discu Skanda 18. L’Anuariu zárrase, como ye vezu, cola sección Collecha, onde apaecen les producciones del añu 2014, diecinueve en total.

 

El volume compleméntase con un discu onde se recueyen muestres de lo meyor qu’ufiertó’l 2014, con dieciséis cortes repartíos n’estilos como la tonada, el folk, el rock, les bandes de gaites o la canción d’autor, con artistes y grupos como El Pravianu, Alienda, Borja Baragaño, Cerezal, Skanda, Vrienden, Luis Núñez o Skama la Rede.

 

Ente los collaboradores d’esti númberu hai firmes como les d’Alberto Álvarez Peña, Xe Mel Sánchez, Mapi Quintana, Lluis Nel Estrada, Xicu Ariza, Xune Elipe, Ignaciu Llope o Adolfo Camilo Díaz.

X