Anuariu 2015

L’Editorial nesta ocasión titúlase «Por una música asturiana viva» y nél trátase de la importancia de les actuaciones en directo como elementu fundamental de la manera nueva de consumir música por parte del públicu, afirmando que: «fai falta una llexilación clara y favorecedora d’esta realidá que, respetando los lóxicos derechos de vecinos y la normativa sobre ruíu, apoye que la música siga sonando nes nuestres cais, que los nuestros músicos y programadores nun se sientan persiguíos»; esíxese tamién a los representantes políticos que seyan responsables y adopten los cambios y midíes necesaries.

 

En cuantes a los conteníos, destaquen: «La resistencia del rock n’asturianu», «De Luar a Isabel Pantoja. Formatos musicales nes televisiones autonómiques», «La Misa de Gaita d’Asturies. El diálogu ente lo culto y lo popular» o «Operación Tonada. Un repasu a la presencia de la canción asturiana nos medios audiovisuales»; les entrevistes a Anabel Santiago o Spanta la Xente; o les cróniques sobre’l festival IV Sol Celta d’Avilés o la Nueche en Danza; amás d’un reportaxe sobre la participación de representantes asturianos en festivales internacionales. L’Anuariu zárrase, como ye vezu, cola sección Collecha, onde apaecen les producciones del añu 2015, venticinco en total.

 

El volume compleméntase con un discu onde se recueyen muestres de lo meyor qu’ufiertó’l 2015, con dieciocho cortes repartíos n’estilos como la tonada, el folk, el rock, les bandes de gaites o la canción d’autor, con artistes y grupos como Anabel Santiago, Filanda, Spanta la Xente, La Tarrancha, Skontra, Bacotexo, K-Nalón o Eladio Díaz Control Z.

 

Ente los collaboradores d’esti númberu hai firmes como les d’Alberto Álvarez Peña, Toya Solís, Ismael González Arias, Eduardo Cosmea, Damián Barreiro, David Guardado, Xicu Ariza, Xune Elipe, Ignaciu Llope o Adolfo Camilo Díaz.

X