Preséntase un llibru sobre l’órganu n’Asturies
Nel marcu del XXIV Festival de Música Antigua de Xixón presentóse’l llibru tituláu El órgano en el Principado de Asturias, una obra editada pola Fundación José Cardín, que representa l’análisis más completu y exhaustivu sobre los órganos y organeros del nuestru país.
El llibru fai un percorríu pelos órganos -tamién llamáu ‘muérganu’- d’Asturies, tanto de los qu’algamaron la declaración de Bien d’Interés Cultural (BIC) como de los que non; inclúise amás una abondante documentación gráfica y archivística. La importancia d’esti trabayu nun se centra namás na información de los órganos que se conserven, sinón que contestualiza’l pasáu del nuestru patrimoniu organísticu y ufierta tamién documentación sobre órganos desapaecíos y organeros d’Asturies. Trátase d’un primer pasu pa la conocencia y caltenimientu del patrimoniu organísticu asturianu, d’interés pa intérpretes y investigadores, pero tamién con un enfotu divulgativu col aquel de llegar a un públicu más ampliu.
Trátase d’un primer pasu pa la conocencia y caltenimientu del patrimoniu organísticu asturianu
L’equipu interdisciplinar responsable d’esta obra tardó cinco años n’acabala, depués d’una xera intensa y desinteresada. Taba formáu pola organista maliaya Susana García Lastra, la musicóloga María Sanhuesa Fonseca y l’historiador del arte Enrique Campuzano Ruiz.
Otra manera, dase la circunstancia de que l’asturianu Jorge Méndez ye ún de los meyores intérpretes d’esti instrumentu singular, amás de reparador y afinador del mesmu, de tol Estáu. Tien publicaos dos trabayos discográficos monográficos sobre él: Música de órgano para Barroco Español (FonoAstur, 1994) -grabáu colos órganos de Santa María de Valdediós (Villaviciosa) y de Santa María de la Corte (Uviéu)- y Suite Mitolóxica Asturiana (FonoAstur, 1996) -una composición suya basada en personaxes de la nuestra mitoloxía como la xana, el cuélebre, el nuberu, la güestia o’l trasgu-.
