«Yo nun taba nada convencida de qu’esti proyectu en solitariu pudiera funcionar, pero dexéme llevar y funcionó perbién»

Una idea, unes persones enfotaes nella y talentu pa desendolcala. Asina foi l’entamu de la carrera en solitariu de Silvia Quesada en 2014 y asina lo cunta ella: “Foi una invención de Pablo Quiroga y Alfredo González. Ellos crearon el personaxe y dempués llegó’l discu de ‘La Pena Abierta’; yo nun taba nada convencida de qu’eso pudiera funcionar, pero dexéme llevar y tengo que dicir que, pa ser un proyectu que pensaba que pasaría desapercibíu dafechu, funcionó perbién”. Un discu, una xira, dalgún premiu y cinco años dempués, la cantante de Tinéu vuelve col so trabayu más ambiciosu y completu hasta la fecha, ‘Prefiero Ver Llover’.

“En ‘La Pena Abierta’ la voz taba vistida solamente cola guitarra acústica de Rubén Bada, el pianu d’Alfredo González y pocos arreglos más; primaba la naturalidá y lo cenciello. Esti nuevu discu, con producción del llionés Pepe López -cola collaboración de los tamién llioneses Fabián y Juan Marigorta-, tien acompañamientos más averaos al pop; ye más elléctricu, en xeneral, y tien dalguna sorpresa musical que nadie espera del mio estilu”. Con estes palabres resume Quesada les novedaes de la so segunda referencia en solitariu; un álbum del que prefier nun dar munchos detalles en primera persona –“tien que descubrilu la xente que lu merque o que lu escuche na rede”-, pero que foi cocinándose pasu ente pasu hasta dar como resultáu diez pieces pop, que van dende ritmos más seles y íntimos hasta otros más baillables, pero toos con daqué en común: cadún d’estos cantares tien la capacidá pa poder sonar en cualesquier espaciu de música mainstream, ensin por ello arrenunciar a la calidá y a una identidá propia. 

“El discu tien acompañamientos más averaos al pop; ye más elléctricu y tien dalguna sorpresa musical que nadie espera del mio estilu”.

Alfredo González ye l’autor principal d’estes composiciones que nacen del “bon equipu” que fai la pareya: “Yo puedo decí-y a él que m’apitez una balada o un tema más rítmicu… Y él ponse a ello. Pero, polo xeneral, son coses que se-y ocurrren a él, tanto la lletra como melodía, y compón siempre pensando na mio voz, por eso les canciones que fai pa min nun tienen muncho que ver coles d’él”. Tamién hai otru tema con música de Javier Tejedor y otru nel que la cantante graba per primer vez un cantar con una melodía compuesta por ella mesma. “Nestos tiempos, munches veces val más ver llover qu’enterase de munches de les noticies que vemos nos medios”, esclaria la de Tinéu sobre’l nome d’un discu con lletres d’histories personales, d’amor y desamor y, tamién, de reivindicación. Precisamente, el primer adelantu del CD foi’l videuclip de “La Mesma Revolución”, un cantar feminista llanzáu el 8 de marzu porque “tovía queda muncho camín que recorrer”. Anque, nel casu de la escena musical, l’artista camienta qu’agora “la cosa ta cambiando bastante y la figura de la muyer ye muncho más visible”.

Con ‘Prefiero Ver Llover’, Silvia Quesada afítase como un nome propiu y con muncho futuru per delantre na música’l país. Esperiencia nun-y faltaba gracies al bagaxe como voz de Los Gatos del Fornu y Tejedor –“alcuéntrome realmente cómoda nel folk y, anque anguaño tea mui centrada nesti proyectu, per otra parte siéntome un poco güérfana”-, pero agora, nesta etapa independiente, va a por toes xunto con un equipu pal que namás tien bones pallabres: “Pablo Carrera d’A Mansalva ta faciendo d’una cosa mui humilde dalgo mui grande, elevándolu a onde yo nunca imaxinara”. El 17 de xineru arranca la xira nel teatru de La Felguera pa llueu percorrer dellos escenarios d’Asturies y d’España demostrando, una vegada más, que la llingua asturiana ta bien viva, que nun tien fronteres y que suena perbién cada vez que s’entemez con un estilu musical nuevu.

Dexa un comentariu

X