CEREZAL – CD ‘La Cereza’l Cielu’

Cerezal nun ye un grupu de música folk al usu. La xuntanza de músicos con fonda esperiencia nel pop, la música tradicional, el rock y la música ellectrónica faen del so soníu daqué perinteresante.

Una güeyada actual al repertoriu tradicional, música de munchos estilos… y de dengún. Lletres cuidaes, igües potentes y tamién un puntu de sensibilidá que tresciende lo meramente musical p’averase a lo lliterariu. A vegaes ye pop fechu con instrumentos emplegáos de vezu nel folk acústicu, y a vegaes ye rock fechu con dances o melodíes celtes.

El so primer discu, “Camín” cuntió coles collaboraciones de Juan Carlos Vega y Victor Manuel y llevó la música de Cerezal per toda España, Francia y Suiza. Foi un ésitu de ventes y sentó les bases d’una propuesta sonora propia. Anguaño, con “La Cereza’l Cielu”, el grupu caltién la llínea de trabayu en cuanto a les lletres propies y actuales, dando una vuelta de tuerca al soníu, más maduru y cola inclusión de sintetizadores y programaciones, que remata nun viaxe pa públicos non sólo avezáos al folk, sinon tamién más poperos, indies o rockeros.