MUYERES – CD ‘País Malva’

País Malva’ ye’l trabayu qu’asoleyó l’asociación de música tradicional Muyeres dempués de 12 años ensin publicar un discu. Ye la so quinta referencia na que compilen 39 cantares tradicionales que dan forma a 2CD y a una edición mui cuidada con un llibretu de 32 páxines.

‘País Malva’ ye un paisaxe sonoru sofitáu nes grabaciones de los primeros etnomusicólogos que documentaren la música tradicional asturiana a mediaos del sieglu XX. Muyeres proponen una nueva llectura d’estos trabayos (testimonios sonoros que, en munchos casos, apaecen venceyaos a la muyer), col aquel de revisar un pasáu entovía recién que forma parte de la nuestra memoria. Al traviés de los documentos sonoros que reviven, reivindiquen la memoria como un campu de resistencia, un llugar poliédricu y, sobre too, común. Un país d’igualdá d’oportunidaes que pinten de malva.