ÚN DE GRAO – CD ‘Pelo Segao’

Ún de Grao ye’l proyectu personal de José Martínez Álvarez, guitarrista y cantante moscón que vive en Xixón, y que lleva dellos años dedicáu a la música tradicional asturiana, participando en grupos como Cuchu, Corzobeyos, Duerna, La Bandina’l Bache y que’acompaña a Héctor Braga, Degañan’s o Dobra (formación del mayestru gaiteru Xuacu Amieva).

Depués del so primer EP, publicáu nel 2016, la música d’Ún de Grao, sigue calteniendo’l respetu poles estructures y patrones tradicionales, pero vese nella’l resultáu de xuntar o amestar la tonada y la música tradicional asturiana a otres corrientes, otros estilos, otres visiones, pa que sía quién a abrise a otres influencies y, asina, facer por que’l nuestru patrimoniu cultural vaya evolucionando y adaptándose a los ritmos d’otros tiempos.

En ‘Pelo Segao’, el primer discu d’él, inclúinse tonaes, añaes y una habanera. Cantares que nacen del nuestru raigañu y que, al pasar peles manes d’Ún de Grao, llénense de soníos propios del rock, armoníes del jazz, del blues, etc. Pa la producción d’esti discu son munchos los enfoques que da a los cantares, dende una interpretación mui íntima hasta propuestes bien arriesgaes con ecos de hard-rock.