Jam de pandereta en Bimenes

La Xata la Rifa sigue col so llabor d’entamar eventos y xornaes culturaes con muncha personalidá y orixinalidá. El siguiente d’ellos va ser el sábadu 21 de febreru na Casa de les Radios de Suares (Bimenes). Dende les doce’l mediudía va haber una jam session de pandereta na que s’anima a la xente a participar antroxao. Amás, como la cita coincide cola celebración de la xornada de los callos y del Antroxu nesta llocalidá yerbata, va poder xintase esti gran platu de la gastronomía asturiana.

L’eventu forma parte de Xtraradio, iniciativa de La Xata la Rifa cola que l’artista y axitadora cultural Mónica Cofiño, en collaboración col Conceyu Bimenes, reabrió’l pasáu 27 d’avientu la Casa de les Radios -que llevaba años zarrada- pa entamar dientro d’esti espaciu grabaciones de podcasts, ensayos, residencies artístiques, formaciones, talleres y otres actividaes culturales.