13 Reyes – Episodiu II n’Uviéu

13 reyes ye’l nome d’un proyectu entamáu pola Banda de Gaitas La Laguna del Torollu y la Banda Sinfónica del Ateneo Musical de Mieres con composición de Yónatan Sánchez Santianes. Un amiestu de narración y música programática que cunta la hestoria de la monarquía asturiana.

Un añu dempués del so anterior pasu pol auditoriu uvieín, la Banda de Gaites La Laguna del Torollu y la Banda de Música Atenéu Musical de Mieres van tornar acompañaes por un ampliu elencu artísticu que va arriquecer la esperiencia escénica y musical. Xunto a elles van participar la Coral Cantares, la Capilla Polifónica Palacio de Meres, el Grupu Folclóricu Trebeyu y la soprano Inés Cortés. A esta propuesta súmase amás la Escuela Gaudiosa d’Esgrima Histórica, con una puesta n’escena nos Premios Gaudiosa del pasáu marzu que dexó fondamente sosprendíu al propiu Yónatan Sánchez Santianes. La narración del viaxe xacobéu va cuntar, al empar, cola voz de Celso Fernández, encargáu de guiar al públicu a lo llargo del Camín.