42 Noite Celta de Porcía

El próximu sábadu 29 d’agostu l’alameda de Porcía, nel conceyu d’El Franco, acueye la 42 edición de la Noite Celta de Porcía. Nesta ocasión l’eventu va entamar a les 21h con un taller de baille tradicional «pra nenos» al que van siguir les actuaciones del grupu folclóricu El Cabazo d’A Caridá; les pandereteres de música tradicional renovada Herbamora; la mítica banda folk irlandesa Dervish; el veteranu grupu folk Felpeyu; y la formación punk-rock Ochobre.

Amás, la víespera de la Noite Celta, 28 d’agostu, a les 20.30h, va haber una mesa redonda dedicada a los grupos d’investigación folclórica. Con esti cartelu, la Noite Celta de Porcía caltién ún de los rasgos más identificativos a lo llargo de les más de cuatro décades que lleva celebrándose: el programar a grupos d’estilos estremaos dientro de la música asturiana y a formaciones internacionales. Asina ye como música tradicional, folk y rock astur van enllenar l’alameda de Porcía hasta les tantes de la madrugada.

L’eventu ye de baldre y tamién va haber sardinada gratuita pa tola xente que s’avere hasta’l festival celta que más años lleva faciéndose n’Asturies ininterrumpidamente.