Cicade n’A Veiga

Por tercer añu consecutivu vuelve CICADE, el ciclu de canción d’autor del Eo qu’esti añu suma una estaya nueva na so programación: el cine independiente. Dende esti miércoles 26 d’agostu hasta’l vienres 28, A Veiga va acoyer esti eventu nel que, ente otres actividaes, actúen Vicente Díaz; los cantadores Alicia Villanueva y Manuel Roza col gaiteru Rodrigo Joglar; y se proyecten les obres audiovisuales musicales Basal y A Cantinera (Os Alonso de Miudes). La programación arranca’l miércoles 26 a les 19.30h na Casa de Cultura d’A Veiga. Ellí va proyectase primer’l documental Basal, una obra que retrata la vida de la cantautora gallega Ugia Pedreira xunto a la so fía Lua Awel, que tien parálisis cerebral. La música ta presente en toa esta obra -que tamién ye un discu d’A Pedreira-, faciendo un percorríu pela Mariña de Lugo y l’occidente asturianu. L’arte como un derechu y la necesidá d’actividaes culturales accesibles pa tolos públicos, independientemente de les sos capacidaes, son otres de les cuestiones que trata esta creación audiovisual. Llueu de Basal, llega’l turnu d’ A Cantinera (Os Alonso de Miudes), una película documental dirixida por Abel Pérez y cola codirección de Lola Cancio sobre la historia de l’agrupación Os Alonso de Miudes (y el posterior pasu a ser a Orquesta Osnola) que funcionó a lo llargo de cuasi cuatro décades nel sieglu pasáu y qu’en 2025 s’estrenó cuando se cumplieron 60 años de la so actuación cabera. Pa la banda sonora d’esta obra fízose un trabayu de composición y adaptación de temes del so cancioneru cuntando con Vero Rubio como coordinadora, con Pedro Pascual como creador y arreglista y coles collaboraciones de Pepín de Muñalen a les flautes, Pablo Pascual al clarinete y Cibran Seixo al violín.

Canción asturiana

Ente les otres actividaes, el vienres 28 d’agostu continúa la programación rellacionada cola música n’asturianu. A les 21h nel Quioscu de la Música d’A Veiga CICADE entama la III Muestra d’Asturianada, na que participan Alicia Villanueva y Manuel Roza a les voces y Rodrigo Joglar a la gaita. Llueu, a les 22h, actúa’l cantante más destacáu del pop llariegu, Vicente Díaz. Con esta cita, el ciclu de Cine Independiente y Canción de Autor del Eo consolídase puxando por llevar la música’l país al occidente asturianu, amás d’otres manifiestaciones culturales d’otros territorios.