Festillingües n’Avilés

Dende esti vienres 17 d’ochobre hasta’l domingu 19 Avilés va acoyer un festival nuevu: Festillingües. Festival de llingües y cultures. Talleres, meses redondes, poesía, teatru de cai, mercáu cultural y otres actividaes dan forma a una programación dientro de la qu’hai presencia de la música n’asturianu. Vero Rubio va poner un taller, Ferla Megía va participar nun alderique y Mestura va dar un conciertu.

«El Palaciu del Marqués de Campusagráu va convertíse nun espaciu vivu onde les llingües y les cultures van atopase, van dialogar y van celebrase. Mientres trés intenses xornaes, el festival va convidar a reflexonar sobre la riqueza del plurillingüismu y a esfrutar d’actividaes pensaes pa tolos públicos». Asina presenta l’eventu la organización d’esti, formada pola empresa Cuatro Gotes Producciones, el mediu VerAsturies y l’asociación Iniciativa pol Asturianu. Too ello col sofitu del Ministeriu de Cultura, la Conseyería de Cultura, Política Llingüística y Deporte y l’Ayuntamientu d’Avilés.

Ente la bayura d’actividaes de baldre y pa tolos públicos la música n’asturianu va tener espaciu en trés espacios: el vienres 17 a les 20h ye la mesa redonda La mocedá crea. Creación artística moza en llingües minorizaes na que participa Ferla Megía xunto a la escritora Blanca Fernández y a la ilustradora Gala Valdés; el sábadu 18 a les 16h Vero Rubio pon un Taller de creación musical pa la reciella; y esi mesmu día a les 20h el dúu Mestura da un conciertu multillingüe. Tola programación pue vese equí.