II MECA. Alcuentru de DJs asturianos n’Uviéu

Vuelve MECA, l’Alcuentru de DJs asturianos, una iniciativa nació l’añu pasáu coincidiendo col Día d’Asturies y col oxetivu d’axuntar y visibilizar a la escena d’electrónica fecha n’Asturies. La segunda edición va celebrase’l domingu 6 de setiembre a les 13h nos Kuivi Almacenes d’Uviéu y nesta ocasión participen un total de 20 DJs. Amás, como novedá esti añu, va haber un espaciu d’Expo & Mercáu, col que sumen la estaya artística a la pgoramación.

Nel apartáu musical participen Altrkaos, Antón Arrieta, Bauer, David Mallada, Delgado, DJ Metrojackbeat, Feistois, Gkabh, Héctor Sandoval, Jairo Catelo, Jorge Blanco, Karman, Kergus, Kessell, Lee Nosh, Men, Monika Osmo, Onopko, Pablo Montes y Sponge, conformando una programación qu’axunta perfiles de distintes xeneraciones y trayectories, reflexando la diversidá que convive anguaño na escena electrónica d’Asturies.

Anque nengún de los DJs ta venceyáu a la escena de música electrónica de raigañu asturianu, MECA sí que fai tola so comunicación n’asturianu, amosando’l so compromisu col idioma propiu dientro d’una escena sonora na que nun suel tar presente. Les entraes yá tán a la venta dende 14 euros pa les primeres persones que la merquen.