Soi Panderetera en Xixón

Dende va unos años, nun hai branu xixonés ensin el Vermú Antiveraniegu de Soi Panderetera, l’agrupación xixonesa de música tradicional surdida al rodiu la Escuela de Música Tradicional La Quintana. La terraza del chigre La Corrada de Cimavilla ye l’escenariu d’esta cita na que’l baille y la música’l país enllenen la cai del barriu altu de Xixón de cultura de raigañu. La convocatoria d’esti branu ye esti domingu 12 a les 13.30h y con ella esta formación continúa una xira de 2026 na que yá dieron nueve actuaciones. La próxima, amás de la del domingu, ye’l 31 de xunetu nel Paséu de Begoña de Xixón, dientro del ciclu Arte na Cai.