Toli Morilla en Xixón

Toli Morilla ye’l más veteranu de la xeneración de cantautores posterior al Nuevu Canciu. Tamién ye de los más aclamaos, con dellos gallardones y nominaciones en premios musicales d’ámbitu estatal y asturianu. Con una cuidada propuesta musical qu’entemez el rock acústicu, la canción d’autor y el folk, tien una discografía que se remonta a 1998 y que ta formada por ocho referencies ente discos d’estudiu n’asturianu y castellanu, un directo, un compilatoriu y el CD de versiones de Bob Dylan n’asturianu.

Nesti casu va interpretar Nueche d’Insomniu. L’espectáculu. Un rellatu curtiu, representáu por un actor a mou de monólogu interior, una coleición de nueve canciones interpretaes en vivo, too dividío en cuatro actos que presenten una reflexón sobre’l procesu creativu d’un autor exiliáu voluntariamente nuna casa solitaria d’un pueblín asturianu.