XXV Memorial Gaiteros de Llonín Pancho y Cundo en Cabrales

El próximu sábadu 29, nel marcu del LIV Certamen del Queso Cabrales, celébrase’l XXV Memorial Gaiteros de Llonín. Pancho y Cundo, una cita clásica pa la música asturiana nel oriente d’Asturies que dende les 18.30h va axuntar asturianada, baille tradicional y folk nel Parque Públicu d’Arenas (Cabrales).

La programación arranca col Festival de Canción Asturiana entamáu en collaboración con AICA (Asociación d’Intérpretes de Canción Asturiana) y nél van participar los y les cantadores de tonada Marina Carbajosa González (ganadora del I Premiu Obdulia Álvarez «La Busdonga» d’Asturianada na categoría moza), Cristina Sánchez Sánchez y Álvaro Fernández Conde. Van acompañar Ricardo Soberado a la gaita y Andrea Joglar al tambor.

Llueu actúa’l Grupu Folclóricu Corri-Corri de Cabrales, formación que nel so día yá bailló xunto a los homenaxaos nesti certame. La programación complétala’l conciertu de Cuévano, «supergrupu» folk formáu por doce componentes con una trayectoria mui destacada y diversa: Xuacu Amieva a la gaita; Julio Rodríguez -50 años menor que l’anterior- al bouzuki; Carlos Velasco y Alicia Villanueva como voces principales; José Alfredo Cordero, Maje Llames, Leti Cienfuegos y Alba Cuadra como coristes; Dani Álvarez como multiinstrumentista ;Chino «El Indio» a la guitarra; Simón San José a la percusión; Alex Petu al baxu y Iván Testón como lletrista y l’alma mater del proyectu.

Pancho y Cundo Galán

El Memorial Gaiteros de Llonín aporta esti añu a la so 25 edición pa facer alcordanza de dos de los músicos tradicionales más destacaos de Cabrales: los hermanos Pancho y Cundo Galán. José Francisco Galán «Pancho. El Gaiteru de Llonín» (1917-2000) foi gaiteru tradicional durante más de 50 años. Actuó per una montonera de llugares d’España, Europa y América xunto al grupu folclóricu Corri-Corri, en solitario o en compañía del so hermanu, Segundino Galán, nombráu Tamboriteru Mayor del Certamen del Queso Cabrales en 2001 y fináu en 2014. Col so fallecimientu, el Memorial que taba dedicáu a Pancho, pasó a homenaxar a estes dos figures fundamentales de la música tradicional nel Oriente’l país.