Alicia Álvarez (Xixón, 1979) forma parte dende 1999 del grupu Pauline en la playa, del que ye cantante, guitarrista y compositora xunto a la so hermana y col que publicó siete discos hasta la fecha. Enantes perteneció a la banda íntegramente femenina Undershakers, cola que editó otros seis trabayos discográficos.

Dende 2015 dirixe, xunto al so compañeru David Guardado, el sellu La Fabriquina, Creaciones Culturales, col que produxo la exitosa colección musical pa tola familia BESTIARIU na que participaron una treintena de artistes asturianos. Baxo esti mesmu sellu, l’artista publicó dos llibros-discos: PULGARINA (2016) y KIKIRIKIKÍ, canciones pa neñes y neños d’Alicia Alvarez (2020)  nel que s’incluye’l tema Préstame pola vida, con gran repercusión nes redes sociales.  La propuesta musical d’Alicia Álvarez pa la reciella caracterízase pola delicadeza y calidá de les composiciones; temes pop enllenos de ternura que falen de los sentimientos y les emociones a traviés d’histories protagonizaes por animalinos, bichos y otros personaxes.

En 2022 asoleya «Asturianes», un llibru con ilustraciones de María Ortiz que percuerre la figura de venti muyeres y colectivos inspiradores d’Asturies, cuatro pertenecientes a la escena musical.