Bras Rodrigo nació n’Asturies y dende críu la gaita foi una de les sos grandes pasiones, entamando a tocala con 5 años. So afición llevólu a dar clases y cursos de gaita en varios países, llegando a fundar y dirixir varies bandes como la Banda Gaites de Corvera, de la qu’aún ye director dempués de 25 años.

La gaita lu lleva a percorrer con ella gran parte del mundu, por llugares como Taiwán, Korea del Sur, Malasia, Chile, Nueva York, Newport, Sao Paulo, República Dominicana, etc. Tamién tuvo nos campamentos de refuxiáos saharauis (Argelia). Nel añu 2007, el Comité Organizaor del Desfile de San Patricio, en Nueva York, lu nombra Coordinador-Executivu en Europa del desfile (que ye ún de los eventos más importantes del mundo pa les músiques del arcu atlánticu) cargu qu’ocupa hasta 2017.

Amás de los trabayos fechos pa otros artistes y entidáes, Bras tien espublizáos 4 discos d’estudiu. Nos sos espectáculos combina ritmos y soníos étnicos de diferentes partes del mundu con soníos ellectrónicos, rockeros y hasta clásicos, acompañáu de la so gaita led, creación propia que caracteriza la so imaxen.