Esti grupu formáu n’Uvieu l’añu 2013 entama la so andadura siguiendo la pauta de les clásiques bandines tradicionales de gaites y percusión que percorrieron fiestes y romeríes de toa Asturies. L’añu 2017 La Garrapiella decide renovar la so propuesta musical y estética p’afondar en soníos a los que les bandines n’activo nun nos teníen avezaos. Por eso incorporen a la formación instrumentos como la cordión de botonera, el saxofón barítono y les gaites de distintes tonalidaes y xueguen col repertoriu tradicional asturianu ensin dar de llau músiques d’otros países o composiciones propies, buscando asina un soníu y un carácter propios. Tán influenciaos por grupos del mesmu estilu como Tribal Jâze (Bretaña) o Too Many Zooz (Estaos Uníos); percorrieron dellos de los festivales y eventos más importantes de la música tradicional del país y rexistraron tou esti camín n’Esmesando, el so primer trabayu discográficu.