Tever entamó a tocar la gaita asturiana col conocíu mayestru gaiteru Manolo Quirós nel añu 1998. Pertenez a la xeneración de gaiteros del nomáu «Boom de la Gaita» que surdió a entamos del sieglu XXI tres l’alta visibilidá qu’algamó l’instrumentu dientro y fuera d’Asturies. 

Amás Tever ye mayestru gaiteru y inxenieru informáticu. Miembru de la Banda Gaites Camín de Fierro y autoproductor de los sos propios proyeutos musicales. Como parte del so trabayu col desarrollu informáticu, tien dalgunos proyeutos empobinaos a la docencia musical utilizando nueves teunoloxíes.

Tres rabilar con nueves teunoloxíes como les Impresores 3D o la circuitería ellectrónica con ferramientes como Arduino, apaez la idea musical d’asoleyar el so primer trabayu en solitario, l’EP ‘Suañu de Gaita’, onde hai 7 temes onde la música asturiana ximiélgase cola música ellectrónica y otres maneres de sentir la gaita.