L’Editorial, nesta ocasión titúlase «Vivir de la música asturiana» y nél fálase de los ataques a la futura oficialidá de la llingua asturiana y a la so rellación cola creación musical, asina, dizse que: «La oficialidá ye una oportunidá única pa, ente otres coses, promover y facilitar la creación de tou un texíu industrial de calter cultural onde la música ha xugar un papel perimportante. La creación musical n’asturianu (y gallego-asturianu) va vese beneficiada abondo cola reconocencia oficial de la llingua cola que trabaya. El Gobiernu Asturianu, nesta etapa nueva que yá s’acolumbra, ha dexar les curties y acomplexaes acciones de calter inconexu y temporal y entamar una verdadera política ambiciosa y efectiva d’apoyu y promoción a esti sector».

En cuantes a los conteníos, destaquen los reportaxes titulaos «Gaites: una historia de ruíu, protesta y rock and roll» (sobre la utilización iconoclasta y reivindicativa d’esi instrumentu) o «Avilés: capital folki d’Asturies» (onde se fai un repasu a les últimes ediciones del Festival Intercélticu, el Sol Celta y la Seronda); les entrevistes a Hevia (na que fala del so trabayu discográficu nuevu, Al son del indianu), a D’Urria (dúu astur-l.lacianiegu que presenten el so primer discu) y a L-R (formación que ta revolucionando la música asturiana col so post-folk); o informes como «Teoría del pop llariegu» (centráu en figures como La Pastorina, Vicente Díaz o Rodrigo Cuevas), «La banda sonora pola oficialidá» (alredor de los cantares de la reivinvidación llingüística), «Los rockeros n’asturianu nun muerren» (sobre les bandes que publicaron discu en 2018) o «Electrónica del país» (que se fai ecu d’esta escena nueva), amás d’un especial sobre la política musical n’Asturies con propuestes de dellos representantes d’esti sector. L’Anuariu zárrase, como ye costume, cola sección Collecha, onde apaecen les producciones del 2018, ventinueve en total.

El volume compleméntase con un discu onde se recueyen muestres de lo meyor qu’ufiertó l’añu, con diecinueve cortes repartíos n’estilos como la tonada, el folk, el rock, el pop o la canción d’autor, con artistes y grupos como Fruela 757, Ún de Grao, Anabel Santiago, Hevia, José Manuel Tejedor, Rubén Alba, Dixebra, Los Berrones, Bacotexo, La Tarrancha o Xaime Martínez.

Ente los collaboradores d’esti númberu nuevu hai firmes como les de Damián Barreiro, Xicu Ariza, Xune Elipe, Alberto Álvarez Peña o Adolfo Camilo Díaz.