L’Editorial, nesta ocasión titúlase «De les bones palabres a los fechos» y nél fálase de les espectatives, a priori positives, que s’abren col equipu que ta al frente de la Conseyería de Cultura, Política Llingüística y Turismu, pero tamién fai alcordanza de que nestos venti años que lleva publicándose l’Anuariu les necesidaes y carencies de la escena musical asturiana siguen siendo les mesmes; nesti sen remárcase que: «Lo realmente importante sigue ensin dase, esto ye, una verdadera política d’apoyu, promoción y salida de la música asturiana per parte de les instituciones públiques, fundamentalmente de la Conseyería de Cultura, que ye la que tien que diseñala, presupuestala y desarrollala. Paez que cuerren aires políticos nuevos, con responsables y cargos na alministración que son conscientes y conocen la problemática d’esti sector, polo que ye de cortesía da-yos un tiempu p’analizar el so llabor, pero ello nun quita pa que-yos faigamos alcordanza de la problemática que tien esta estaya tan significativa de la Cultura Asturiana».

En cuantes a los conteníos, destaquen los reportaxes titulaos «Relevu xeneracional na música asturiana» (onde opinen delles de les promeses nueves del panorama sonoru) o «Tócala otra vez, ne» (cómo inflúi la ficción audiovisual na promoción de les músiques autóctones); l’informe «Asturies, paraísu musical» (sobre les rellaciones ente la música propia y la promoción turística); la crónica «Morrió’l celtismu, ¡puxa’l celtismu!» (sobre’l XX Seminariu d’Estudios Asturianos de la Fundación Belenos, dedicáu al celtismu musical); un especial n’alcordanza del músicu Elías García; o entrevistes a Llan de Cubel, Eva Tejedor, Silvia Quesada, Caldo y Os Rabizos y Cerezal. L’Anuariu zárrase, como siempre, cola sección Collecha, onde apaecen les producciones discográfiques del 2019, trenta y cinco en total.

El volume compleméntase con un discu onde se recueyen muestres de lo meyor qu’ufiertó l’añu, con diecinueve cortes repartíos n’estilos como la tonada, el folk, el rock, el pop o la canción d’autor, con artistes y grupos como Fruela 757, Xuacu Amieva, Llan de Cubel, Cerezal, Eva Tejedor & Les Pandereteres, Nacho Vegas, Silvia Quesada, Ilustres Patilludos o Pop Piquiñín.