Anuariu 2023

L’Anuariu de la Música Asturiana llega un añu más fiel a la so cita per estes feches y failo con un repasu fondu a lo que dio de sí’l pasáu 2023. Como de costume les temátiques céntrense n’estilos como la música tradicional, el folk, el rock o la canción d’autor, con secciones qu’inclúin reportaxes, informes, entrevistes, crítiques, opinión, recoyida de material o anuncies. 

 

L’Editorial, nesta ocasión, titúlase «Responsabilidá pública» y nél fálase del papel que l’alministración autonómica debiera xugar na promoción y apoyu a la escena musical propia, n’especial per parte de los medios de comunicación de titularidá pública; nesti sen, manifiéstase: «La historia y la importancia de la música asturiana fai que cuente con una entidá suficiente como pa tener un tratamientu específicu nel ente de comunicación públicu asturianu, de manera especial na radio, mediu particularmente amañosu pal so espardimientu. Nesti contestu, ye más que necesariu un programa concretu nel que tratar tolo relativo a la mesma, dándo-y un enfoque global, conociendo la so historia, novedaes, noticies, publicaciones, actuaciones… Un espaciu que promueva l’interés por ella y que cree un públicu estable, que consuma los sos productos y vaya a disfrutar del directo de los y les sos artistes».

 

En cuantes a los conteníos, destaquen la crónica titulada «De Glasgow a Villaviciosa pasando per Ortigueira» (resume de l’actividá folk a lo llargo del 2023); l’informe «Del cine mudu al españíu del 2023: una historia del videoclip n’asturianu» (sobre l’audiovisual musical del país dende principios del sieglu XX hasta anguaño); los reportaxes «Prohibío cantar n’asturianu nestes fiestes» (alredor de la polémica xenerada poles declaraciones de dellos conceyales de Xixón tocante a vetar a los y les artistes qu’empleguen la llingua asturiana) y «Somos mundiales» (repasu a cómo se foi produciendo históricamente la internacionalización de la música del país); l’artículu dedicáu a facer alcordanza de Xulio Ramos; o les entrevistes a los grupos La Bonturné y Alienda y a Rodrigo Cuevas. L’Anuariu zárrase, como siempre, cola sección «Collecha», onde apaecen les producciones musicales y bibliográfiques del 2023. 

 

El volume compleméntase con un discu nel que se recueyen muestres de lo meyor qu’ufiertó l’añu, con diecisiete cortes d’estilos como’l folk, el rock, el pop o la canción d’autor, con artistes y grupos como Antón Menchaca, 6 Riales, Calea, Mapi Quintana, Haim Fernández, Bango, Ana Lamela o Diañu Blues.

X