Artículos de Fernando Largo

La figura y la obra de Fernando Largo Vallaure (1960-2010) ye fundamental pa entender el surdimientu del folk contemporáneu asturianu; esti arpista y zanfoñeru ye autor de delles de les pieces icóniques del mesmu, revelándose como un compositor esquisitu, elegante y fondamente consciente de per ónde tenía qu’empobinar la renovación de la tradición musical del país.

 

Amás de músicu y productor fonográficu hai qu’añader el so llabor como divulgador musical al traviés del programa ‘Gaitas, arpas y zanfonas’ na emisora Radio Asturias, qu’a lo llargo de bien d’años foi un referente de la música del país nos medios de comunicación. Nesti campu hai qu’inxertar y contestualizar la serie d’artículos periodísticos que publicaría a principios de los años 80 nel diariu La Nueva España; nellos l’autor trata sobre temes y aspectos estremaos de la música tradicional y el celtismu musical.

 

Nel Archivu de la Música Asturiana Contemporánea (AMCA) ufiertamos una muestra d’aquella xera periodística, unos materiales que, anguaño, pueden resultar perinteresantes pa entender dafechu les circunstancies y l’ambiente nel que surdió’l folk asturianu contemporáneu.

X