La Banda Gaites Camín de Fierro fúndase nel añu 2002 nos conceyos asturianos de Proaza, Santu Adrianu y Teberga. El so nomatu surde pola vía de ferrocarril mineru que xunía los tres conceyos y que n’actualidá ta reconvertíu n’una senda verde perconocida como Senda l’Osu.

Fórmenla venti músicos, ente gaiteros y percusionistes, dirixíos por Balbino Menéndez y Arsenio Ruiz. En toos estos años de trabayu musical tocaron en festivales asturianos como Intercélticu de Tapia de Casariegu o Intercélticu de Avilés y festivales foriatos como Guingamp, Confolens o Intercélticu de Lorient, amás de faer una pequena xira per l’Arxentina.

Nel 2012 publiquen el so primer trabayu discográficu nomáu “10 años nel camín” col qu’algamen el Premiu AMAS na categoría de Gaita y el premiu de la Crítica de RTPA al Meyor Discu Folk. En 2021 asoleyan el discu “Rock & Fierro”, un espectáculu que convida a esfrutar de la música dende’l primer minutu y nel que ponen enriba l’escenariu tola so esperiencia musical xunto a una banda rock p’algamar un soníu propiu y innovaor.