HÉCTOR BRAGA – Llibru Nel cantu la memoria. Ensayu sobre l’asturianada tradicional

Llibru col que’l músicu y doctor en Musicoloxía, Héctor Braga, algamó’l premiu XXIX Premiu Máximu Fuertes Acevedo d’Ensayu que convoca’l Principáu d’Asturies. A lo llargo de 334 páxines l’autor percuerre’l xéneru musical más representativu d’Asturies.

«Cantar ye un fechu artísticu y comunicativu. Y pue ser, como toles tradiciones, una resistencia escontra’l desarraigu de la globalización y una reafirmación identitaria. La xente nun canta pa ser feliz, sinón que ye feliz porque canta. Y l’asturianada ye dalgo más que too eso: ye la banda sonora del tiempu de nueso. Ye una d’eses músiques onde, como dixo Cioran, somos quien a apalpar el tiempu porque falen d’eternidá mesmo qu’un muérganu del tiempu.

Un tiempu qu’agora toca regular con lleis musicales y tresparencia. Porque de xemes en cuando, el tiempu alluga’l contratiempu d’acolliñar y esclariar la realidá con lluz y taquígrafos. D’esti mou vamos dici-yos a los llectores que fadremos tolo posible pa que nun vean l’asturianada como les vaques al tren, nin vuelvan a reverenciala, como dixo Mark Twain, mesmo que xabalinos al arcu la vieya. Nesti ensayu cuéntase tolo que ye, cómo se forma y de qué ta fecha. Estes van ser unes páxines llargues, amañoses y precises pa nun perder la memoria de lo que s’arrequexa nel cantu d’ella. Más nada».