Actualizamos les playlists de Música Asturiana, Folk, Rock y anovamos los diseños de toes

Hai unes selmanes Musicasturiana.com superó los 10.000 siguidores n’Instagram. Pa festexar esti finxu, anovamos tola estética de les nuestres playlists de Spotify y actualizamos los cantares de les llistes de reproducción principales: Música Asturiana, Folk Asturianu y Rock n’Asturianu. Amás, tamos trabayando p‘asoleyar playlists nueves nes próximes selmanes y asina siguir avanzando na nuestra xera d’esparder la música’l país per tol mundu gracies a les plataformes musicales.

Musicasturiana.com tien cuasi 70 playlists creaes en Spotify y la suma d’elles algama más de 6.500 siguidores. Amás de nes que suenen les novedaes, la música asturiana en xeneral y estilos musicales en concreto, hailes tamién de calter temáticu; otres dedicaes a artistes pernomaos (la serie Esto ye); les de les esbilles musicales qu’escueyen les y los protagonistes de les entrevistes de La banda sonora de; y dalgunes qu’acompañen a dellos artículos que fueron asoleyándose nesti mediu de comunicación.

Tres de varios años ensin actualizar estes llistes de reproducción, Musicasturiana.com celebra los más de 25.000 siguidores que tien ente Instagram, Spotify, YouTube y Facebook anovándoles La primer novedá ye estética, porque a partir d’agora cada llista de reproducción ta dedicada temporalmente a un artista rellacionáu con ella. La otra ye que suenen hores y hores de música d’ayeri y güei.

Fomentar el consumu y conocimientu

Asina ye como la de Música Asturiana recueye 80 temones de la música contemporánea que reflexen la diversidá sonora d’esta escena; la de Folk Asturianu compila 70 temes con soníos de raigañu folk, celta, tradicional, gaita, pandereta, electrónica, folk-rock, indie-folk, bandines; y na de Rock n’Asturianu suenen 60 cantares rock, folk-rock, punk, ska, pop-rock, reggae, hardcore y metal.

Xunto a elles, caltiénse otres como la de ¡A Baillar!, dedicada a la música tradicional pal baille; la de Novedaes, na que van xubiéndose tolos temes asoleyaos recién; y toles otres mentaes anteriormente. L’actividá de Musicasturiana.com en Spotify ye una ventana al mundu pa esparder la escena sonora del país y pa facilitar que la xente conoza y consuma la música n’asturianu.