En 1997 cuatro collacios de Cangues d’Onís xuntáronse pa crear un grupu de punk-rock nomáu Mala Reputación. D’entós pacá pasaron 29 años y esi mesmu grupu de cuatro collacios convirtióse nuna de les formaciones más veteranes y reconocíes a nivel estatal del rock fechu n’Asturies. Tres cuasi trés décades esta historia tien puntu y final: en payares de 2027 van dar el so últimu conciertu. Pa homenaxar a esti grupu fundamental creamos la playlist Esto ye: MALA REPUTACIÓN na que compilamos tolos temes n’asturianu qu’asoleyó’l grupu.
«Nun hai motivos estraordinarios pa dexalo, nun hai que da-y vueltes. La vida fai que cada vegada seya más difícil cuadrar axentes pa dedica-y el tiempu que’l grupu merez. Enxamás vivimos del grupu pero nun hai dulda de que sí vivimos per un tiempu llargu por y pa él, por eso queremos despidinos como creemos que Mala Reputación y los sos siguidores merecen«, desplicó’l cuartetu nes sos redes sociales. Asina ye como anuncien que «durante’l próximu 2027» van tocar «en dellos festivales» y payares van dar «puntu y final a la xira con dos conciertos en sales de Madrid y Asturies«.
«Marcha una parte importante de la nuestra vida. Gracies por llevanos onde nun nos imaxináremos. Gracies por facenos marchar cola conciencia intacta y la tiesta bien alta«, conclúi’l comunicáu del grupu, qu’aseguren que yá tomaron esta decisión va tiempu: «enantes de facer los cantares de Queda ente nosotros«, l’EP qu’asoleyaron el pasáu mes de mayu.
Mala Reputación tienen 10 trabayos publicaos que destaquen pola so evolución y madurez; dende unos entamos más punk-rock, hasta facer anguaño un rock posáu, cuidáu y con muncha personalidá propia; esi carácter que fai d’esti cuartetu una formación única dientro de la escena rockera asturiana y estatal.
Anque canten mayoritariamente en castellanu, el grupu siempre amosó’l so compromisu cola llingua asturiana nes sos intervenciones públiques y en redes sociales. Dientro del so repertoriu n’asturianu destaquen himnos como ‘Sin Atadures’, ‘Raigaños’ o ‘Fálame’ y con ellos collaboraron músicos de la escena de música n’asturianu como Xune Elipe de Dixebra, Corquiéu o Skama la Rede. Dende Musicasturiana.com compilamos tolos temes que cantaron na so llingua materna dientro de la playlist Esto ye: MALA REPUTACIÓN. Milenta gracies por tanto Daviz, Kiko, Juan y Michi.
Suscríbite a les nuestres novedaes
