Charra «La sesión folk: una guía para principiantes» n’Uviéu

El martes 24 de marzu de 17.45h a 20h Celia Nieto, Pablo Fernández y Marta Fernández, miembros de la Xunta Cultural Caricós van tar nes Xornaes Culturales del Conservatoriu Profesional de Música «Anselmo González del Valle» d’Uviéu. La sesión folk: una guía para principiantes ye la propuesta d’esta asociación creada hai un añu; una charra participativa que pretende tornase nun averamientu al ecosistema de les sesiones folk, revisando les sos dinámiques, el so repertoriu y los principales conceptos venceyaos a la música tradicional.

Na actividá va afondase nel repertoriu habitual d’estes sesiones, amosando pieces que quiciabes nun son conocíes pa los oyentes del Conservatoriu y buscando potenciar que los participantes s’axunten pa tocar música de mou informal y compartíu.

Anque esta ye la primer vegada que Caricós fai una charra d’esti calter, l’asociación apuesta por poner en valor la socialización al traviés de la música tradicional y esperen poder repetila nun futuru n’otros espacios.