Fae unos meses, presentóse en redes sociales una nueva asociación alrodiu la música folk y tradicional: Caricós son un grupu de xente mozo que busquen fomentar l’interés y facilitar que la xente s’avere a la escena folk asturiana a traviés de la xeneración d’espacios y conteníu divulgativos y sobre too recreativos. Falamos con elles sobre los sos oxetivos y la so visión de la escena anguañu.
¿Cómo, cuándo y por qué naz Caricós?
Caricós naz nel 2024 a raíz de la esperiencia de participar nel grupu de voluntariáu del Llar Trad Fest, nel que brotaron les nueses ganes de crear daqué nuevu y bono pal folk asturianu.
Xurde pola necesidá de materializar munches idegues que nun taben presentes na escena y que veíemos que nos gustaría ufiertar a xente nueva interesada. Amás, notábemos una ausencia de xente mozo na escena folk, porque agora la mocedá ta desplazada al baille y les estétiques más tradicionales.
«Xurde pola necesidá de materializar munches idegues que nun taben presentes na escena y que veíemos que nos gustaría ufiertar a xente nueva interesada.»
Na semeya que publicastis en redes sociales apaecéis delles persones venceyaes a la música asturiana d’una o otra manera. ¿Quién formáis Caricós? (formación, orixe xeográficu, edá, proyectos nos que participáis…
Somos cinco amigues, todes musicólogues. Ta Celia, (Candamu) vigulinera dende bien ceu, ye parte de varies agrupaciones folk asturianes. Marta (Muros) ye doctoranda na Universidá d’Uviéu, y ta faciendo una tesis sobre’l folk n’Asturies. Josefina (Arxentina) ye gaitera, flautista y ta venceyada al mundo del folclor a traviés del baille tradicional. Marina (Salas) ye percusionista y profesora de música, y Pablo (Uviéu) toca la guitarra y fae periodismo musical.
Destaca que sois xente mozo y que tenéis rellación ente vos. ¿Cualquier persona de cualquier edad puede formar parte d’estiu proyecto o sois un grupo zarréu?
Pol momentu tamos intentando facer coses y organizar nosotros la asociación, pensamos que ye más fácil, sobremanera al entamu. Dientro d’un tiempo, queremos abrimos y que participe más xente, pero pol momento preferimos dexar les coses más clares no referente a la manera de trabayar, pa dexar una bona base sobre la que seguir medrando.
Na vuestra presentación faláis de “disfrutar de la música folk y tradicional n’espacios de convivencia amigables”. Si podéis afondar más nesta cuestión…. En rellación a esto ¿Creéis que quiciabes nesta escena hai espacios más zarraos nos que cuesta poder entrar?
Nun son ambientes zarraos, pero a vegaes, el nivel de la xente que toca, y de los mismos grupos de folk y música tradicional, ye bastante eleváu. Pensamos que nun hai una variedá d’espacios y niveles que permita xenerar relevu fácilmente y facer del folk daqué más cotidiano.
«Dientro d’un tiempo, queremos abrimos y que participe más xente, pero pol momentu preferimos dexar les coses más clares no referente a la manera de trabayar, pa dexar una bona base sobre la que siguir medrando.»
¿Podéis desplicar más fondamente tamién caúna de les otres cuatro idees coles que vos presentastis en redes sociales?
Pretendemos crear conteníu didáuticu, divulgativu y recreativu en redes sociales que seya de fácil accesu pal publico interesáu y aquel que se pudiera averar a raíz de les nueses publicaciones. Magar de que nunca nun dexamos de ver actividá creativa na escena asturiana, queremos potencialo y xenerar inda más movimientu.
Tamién pensamos que ye necesario descentralizar l’actividá y repartir eventos, conciertos y sobremanera sesiones pela xeografía asturiana. Que nun haya que venir al centru pa poder alcontrar una sesión. Sicasí, el nuesu mayor desafíu ye quiciabes poner a Asturies en contautu col restu de comunidades folclóriques, sobre todo ente les xeneraciones moces.
¿Conocéis más iniciatives como la vuestra de fuera d’Asturies?
Sí, ye un modelu que podemos topar en munchos sitios; n’Arxentina hai delles asociaciones que faen slow sessions de música irlandesa. En Llar, dientro’l grupo de voluntariáu, una compañera francesa comentó que participa n’una asociación que mos sirvió de referencia pola manera de funcionar. Y equí n’Asturies, Les Pites son tamién un espeyu nel que mirase pa crear espacios amigables alrodiu la música asturiana.
«Ye necesario descentralizar l’actividá y repartir eventos, conciertos y sobremanera sesiones pela xeografía asturiana. Que nun haya que venir al centru pa poder alcontrar una sesión»
¿Tenéis yá actividaes organizaes pa desendolcar próximamente?
Tamos faciendo sesiones lentes, conteníu pa redes como la nuesa seición “Repertoriu en comprimíos”, y esti añu tamos ayudando a organizar les Xornaes del Vigulín.
Ta rematando’l branu y con él una axenda más intensa de festivales y fiestes. ¿Qué balance facéis de l’actividá qu’hubo en rellación a la escena folk y tradicional?
Hai una montonera d’eventos; casi tolos findes tenemos varies opciones pa escoyer. Pensamos que la actividá ye bona pero tien d’estendese más allá del branu. Prestaríanos qu’hubiese más xente mozo nel públicu, y non sólo como participantes d’asociaciones culturales.
La mocedá tais garrando puxu na escena asturiana. Munchos de los grupos nuevos tán formaos por xente mozo, Caricós sois xóvenes… ¿Por qué creéis que ta pasando esto?
Ye daqué natural: tien de haber, y hai relevu, pero nós queremos más.
Les asociaciones munches vegaes son interlocutores cola alministración y planteguen una serie de meyores y reivindicaciones colectives. ¿Tenéis tamién esi enfotu?
Ye verdá que l’alministración ye una pieza qu’en funcionando bien, facilita muncho procesos como estos, pero pol momentu apostamos por una modalidá de trabayu autónoma y autoxestiva. Sicasí, nun descartamos ser altavoz de reivindicaciones u organizaciones colectives si estes cuadren colos nuesos oxetivos y valores.
«Tien de haber, y hai relevu, pero nós queremos más»
En rellación a esto, ¿cómo valorais les polítiques culturales existentes y qué consideráis necesario dende esti ámbitu pa qu’esti son siga espoxigando?
El fechu de que queramos ser autónomos y autoxestivos nun fae que seyamos inmunes a lo que pasa alredor. Si se xenera una ufierta cultural que meta la música tradicional na so axenda, y non n’espacios de nichu, sinón nel mesmu planu que’l restu de la programación comercial, podrá xenerase un interés mayor. Nun hai qu’ufiertalo a quien ya lo consume, sinón a quien lo puede llegar a consumir.
A diferencia d’escenes musicales d’otros territorios y d’otres disciplines artístiques, na escena de música’l país hai mui poco asociacionismu. ¿Cómo valoráis esto? ¿Vais tener rellación con otros colectivos culturales d’Asturies y de fuera?
Pensamos qu’Asturies ye claramente un territoriu d’apoyu mutuo non institucionalizáu en asociaciones como sí pasa en otres rexones del Estáu, la colectividá sientese de forma distinta n’esti territoriu tan marcáu poles males comunicaciones fisiques y diplomátiques. Poro, como comentamos enantes, ún de los nuesos mayores logros sedría poder facer red con asociaciones d’otros territorios ya conocer otres formes de vivir les músiques de raigañu.
«Nun hai qu’ufiertalo a quien ya lo consume, sinón a quien lo puede llegar a consumir»
Y yá pa rematar, como xente apasionao de la música folk y tradicional. ¿De qué salú gocia la escena y que creéis que fai falta pa qu’esta ameyore más?
Somos positives, pensamos que meyora día a día y ta al alza, no a niveles de finales de los 90 o lo cabero de los 2000. Fai falta qu’esta música torne a ser parte de lo cotidiano de más xente. Yá ta presente nel día a día, pero tien que tar presente fuera de los conciertos y les muestres. Tien d’usase por más xente, ser útil y poder sentila como propia por ello. Amás, hai que dexala evolucionar, sin sometela a normes nin estétiques anclaes n’otros tiempos. Quiciabes pa que medre más y de forma saludable deberíemos entamar a integranos n’un hábitat musical supra-rexonal.
Suscríbite a les nuestres novedaes
