GastroPrau Fest en Xixón
La música asturiana suma un festival nuevu, el GastroPrau Fest. El 25 de setiembre de 19.30h a 23h el Muséu del Pueblu d’Asturies de Xixón va enllenase de folk, asturianada renovada y pop gracies a les actuaciones de José Manuel Tejedor, Algaire, Picarós, Leirana, Antón Menchaca, Eva Hevia y Banda Gaites Saxum. Too ello nun eventu entamáu por Tierra Astur qu’axunta música y gastronomía pa «celebrar y reivindicar» el mundu rural asturianu y con unos beneficios que van dir en solidaridá cola producción de queso Los Beyos.
«Un eventu contemporaneu, accesible y integrador, na qu’Asturies cuntase a traviés de la so gastronomía tradicional, la so cultura y la so música«. Con estes pallabres presenta Tierra Astur la primer edición d’un eventu que, con una entrada de 39 euros, inclúi un buffet de cuasi 50 variedaes de quesos artesanos asturianos y un menú formáu por dellos platos fechos con productos IXP (Indicaciones Xeográfiques Protexíes): ternera asturiana, faba asturiana, choscu de Tinéu, miel d’Asturies, amás de sidra y vinu de Cangas DOP.
«GastroPrau Fest nun sería un fest ensin unos artistes a l’altura, y la fiesta del campu asturianu sería menos fiesta, y menos asturiana, ensin tener música, y músicos asturianos«, plantega Tierra Astur na publicación de redes sociales coles qu’anuncia a los artistes del eventu: el pernomáu gaiteru José Manuel Tejedor, la banda de música tradicional renovada Algaire, el tríu de folk celta Picarós, el proyectu Leirana de Nel Villanueva, Antón Menchaca cola so tonada renovada, la Banda Gaites Saxum y Eva Hevia, artista pop en castellanu que fizo dalgún averamientu recién a la música de raigañu como’l del single ‘BUMBUM‘. Un cartelu formáu por «artistes consagraos, pero tamién con talentos nuevos pa, ente toos, crear un ambiente de diversión, cercanu y auténticu».
Iniciativa privada y solidaria
Esti festival entamáu por Tierra Astur tien el patrociniu de la marca Alimentos del Paraísu Natural, Caja Rural de Asturias y la collaboración de la FMCEyUP de Xixón, el Muséu del Pueblu d’Asturies, Picofino, El Comercio y Ser Gijón; y destaca, ente otres coses, por ser una de les poques iniciatives qu’una empresa privada asturiana d’un sector non venceyáu a la cultura fai por programar un festival protagonizáu pola música asturiana. Amás, tolos benificios van dir destinaos a sofitar la quesería nueva de Los Beyos, la única IXP que nun tien producción: «vamos emburriar la producción d’esta ayalga gastronómica ente toos», planteguen dende Tierra Astur con esti GastroPrau Fest.