El vienres asoleyó en toles plataformes musicales el single y videoclip de ‘BUMBUM‘, lo nuevo que publica l’artista asturiana Eva Hevia a comuña col cantante brasileñu afincáu n’Asturies VALOIS y los músicos Daniel Meré y Diego Lobo a les gaites y Adrián Argüelles a la flauta. El cantar ye una apuesta por «axuntar ún de los xéneros más virales del mundu agora mesmo, que ye’l funk brasileñu, cola fuercia épica de la gaita«, como desplica la propia Hevia. El resultáu: un «choque de cultures que ye enerxía puro«.
«Pa innovar hai que respetar los raigaños. Nun quería que la gaita fuera un simple adornu de fondu, sinón que tuviera’l protagonismu y la identidá de la nuestra tierra, amosando que la música tradicional pue sonar xigante nun contestu urbanu y global«, cunta esta artista criada ente Riosa y Morcín y residente n’Uviéu. «El folclore siempre tuvo dientro de mí y tien una importancia penriba d’otros xéneros nos que nos movimos nos últimos años», añade Eva Hevia afirmando que tenía gana de facer dalgo que fuera acullá de les músiques pop, r&b y electrónica coles que trabaya dende qu’entamó la so carrera en solitario en 2020.
Asina ye como ‘BUMBUM’ «surdió de manera natural nel estudiu» y introduz soníos de raigañu de la mano de trés destacaos músicos del país: Daniel Meré (director de la Banda Gaites Cabu Peñes y bien conocíu polos sos videos virales en TikTok faciendo versiones de temes mainstream cola gaita), Diego Lobo (director de les bandes de gaites Saxum y El Gumial, troféu MacCrimmon nel Festival Interceltique Lorient y ganador del Memorial Remis Ovalle trés vegaes) y Adrián Argüelles (gaiteru en La Garrapiella y flautista n’Entós y L.lueñe). «Compuse la melodía a pianu y ellos adaptáronla perbién, llevando los instrumentos tradicionales a otru nivel nel estudiu», destaca Hevia, qu’amás d’ellos y del cantante VALOIS, tamién s’arrodió del productor venezolano asitiáu n’Asturies FABV, «que tien trabayao con nomes grandes de la industria como J Balvin, Kali Uchis, Abraham Mateo o Ptazeta«.
Con esti tema nuevu, Eva Hevia da un pasu más nel so venceyu a la música asturiana. Yá cantó una versión del himnu d’Asturies, va unes selmanes collaboró cantando cola Banda Gaites Saxum nel Xixón Folk y agora llanza esti tema nel que-y da visibilidá a la música tradicional nun contestu nuevu dafechu. A la entruga de si quiciabes dalgún día va poder sentise un tema d’ella n’asturianu, tienlo claro: «Ye probable qu’enantes de lo qu’imaxinéis. Tovía tengo que deprender muncho y siguir evolucionando cola mio música, pero encantaríame que puea salir un tema míu n’asturianu«. Mentanto, pue sentise esti ‘BUMBUM’, un cantar qu’asegura que la fai «feliz, porque pa mí yera un retu enorme y tenía muncha gana de meter dalgo que m’identificara y apostar polo de casa, polo nuestro«.
Suscríbite a les nuestres novedaes
