Martes 20 d’ochobre. Son les 9.50h de la mañana y salimos de la oficina d’El Natahoyo pa El Poblao de Santa Bárbara. De barriu obreru a barriu obreru. Somos clase trabayadora y esto va tar bien presente en tola conversación que tenemos con Mapi Quintana. Precisamente, esta ye la razón pola qu’entamamos esta cita: conocer cómo ye la rutina d’una profesional de la industria musical asturiana.
En diez minutinos aportamos a esti barriu xixonés construyíu na década de los cincuenta p’agospiar a les families trabayadores de la Fábrica de Moreda. Nél hai 202 viviendes y Quintana, natural de La Pola L.lena, vive nuna d’elles dende hai años. Ye, amás, la presidenta de l’Asociación de Vecines y Vecinos; un llabor que vimos de primer mano cuando, en medio la entrevista, una vecina picó a la puerta casa porque teníen una avería y Mapi tuvo que dir con elles a iguar la situación. Amás d’artista; alcaldesa estraoficial.
«Yo siempre quixi ser veterinaria, pero en segundu de BUP zapiqué coles matemátiques», ye l’exemplu que pon Mapi Quintana pa desplicar cómo trabayar na música nun foi daqué planificao Entamó estudiando arte dramáticu, pero la música daba-y una «felicidá» que nun-y tresmitía otra cosa. Asina ye como fizo’l Grau Mediu de Pianu nel Conservatoriu de Xixón y, n’acabando, aprovechó «una bequina de los fondos mineros» pa dir a Holanda a facer la llicenciatura, el grau superior y un máster en jazz.
20 años trabayando na música
Los primeros pasos nesti sector foron de manera amateur, tocando na Big Band de Xixón y cantando con un grupu l.lenizu de rock llamáu Tela. En 2004, yá entamó a tocar de manera profesional con Bernie’s Lounge y otres bandes d’Amsterdam -recalca qu’ellí, nel conservatoriu, animábenles a entamar grupos y tocar xuntes tres de les clases-. En 2009 torna p’Asturies -nesa época publica’l so primer trabayu en solitario, El Sonar de les Semeyes-, y algama una llicencia del Estill Voices Training System pa entrenar voces: «Fui la primera en llicenciar nel norte d’España. Daquella seríemos en total unos 20 profesores d’esto». Gracies a esto dio clases a xente como Rodrigo Cuevas, Algaire, Belen Antón, Sandra Álvarez, Odón del Paganéu, Lorena Corripio o José Manuel Collado. Sicasí, sorraya que «la docencia nun foi daqué escoyío, foi por necesidá».
«Y sobre la marcha, sobre la marcha, toi equí. Enxamás me plantegué ser otra cosa aparte de lo de veterinaria. Home, a vegaes hai époques de crisis que dices “ufff, vaya fartura de dar clases y de nun facer arte”. O pienses en sacar unes oposiciones de Correos o ser logopeda», pero Mapi Quintana siguió percorriendo llocales d’ensayu y escenarios cola so voz y los sos instrumentos; formando parte d’otres bandes -anguaño toca con Rodrigo Cuevas y con Girls to the Front- y entamando tamién proyectos propios.
«Enxamás me plantegué ser otra cosa aparte de lo de veterinaria. Home, a vegaes hai époques de crisis que dices “ufff, vaya fartura de dar clases y de nun facer arte”. O pienses en sacar unes oposiciones de Correos o ser logopeda»
«Agora toi dedicada al 90% a Rodrigo Cuevas. Toi nun puntu de mio vida d’estabilidá máxima gracies a esto y valoro esti momentu como una lotería que me tocó, porque nun tengo que preocupame más que de xubir al escenariu y tocar la pandereta bien y cantar bien». Pero «n’abril acaba la xira de Rodri y hai l’abismu». Ella nun quier volver a poner clases asina que la so decisión ye centrase na so carrera propia: «Siempre que lo veía un poco feo daba clases y los mios proyectos quedaben nun segundu planu. Pero tengo 48 años y siento que realmente nunca aposté al 100% polos mios proyectos. Cualquier día caime una teya enriba la cabeza, queda esto empantanao y nun pue ser». Asina ye como a partir d’abril de 2025 va tar La Maramoniz, Working Class, Girls to the Front y más frentes que-y «presten pola vida» y que l’ayuden a espresar les sos inquitúes como artista.
«Siempre que lo veía un poco feo daba clases y los mios proyectos quedaben nun segundu planu. Pero tengo 48 años y siento que realmente nunca aposté al 100% polos mios proyectos. Cualquier día caime una teya enriba la cabeza, queda esto empantanao y nun pue ser»
La xornada llaboral nel so espaciu creativu
«Llevántome dempués de dormir ocho hores. Yo nun tengo rutines porque cada dos díes toi garrando un avión o una furgoneta, entós nun faigo tolos díes lo mesmo. Pero cuando toi en casa esconsono, atiendo a los animales, almuerzo; si tengo oficina siéntome equí col ordenador; y si toi en metá d’un procesu creativu, marcho pal estudiu que ta na güerta y enfócome en facer música».
Pal trabayu d’oficina, esta creadora l.leniza tien dos llibretes: «una la de les perres y otra la de les tarees». Nuna d’elles ta’l «presupuestu mensual» y na otra l’axenda colo que tien que facer: mandar factures, facer papeléu, coordinar ensayos, sentir conciertos que yá tuvo, contestar al Instagram… «Hasta que nun acabo les xeres nun me llevanto. Si veo que me toi allargando muncho, a la una y cuartu llega’l panaeru, compro’l pan, como y continúo». Precisamente «el panaeru ye’l que marca l’horariu y los descansos» nestos dos tipos de xornaes tan estremaes.
«Cuando toi nun procesu creativu la parte d’oficina pasa a un segundísimu planu; intento que seya cosa de media hora tolo más. Llueu yá vengo pal estudiu. Primero escucho, o doi per equí vueltes, canturreando, garro un llibru y toco un poco, hasta que tengo una idea. Intento estimulame de toles maneres posibles». Nel so estudiu Mapi ta arrodiada de lluz y d’instrumentos -un tecláu, un microkorg, percusiones, un contrabaxu…-, tien un cuartu de bañu, una pequeña cocina, una nevera y una cama. Ye un espaciu de concentración y l’artista pon l’exemplu de cuando compuso Música pa tornar páxaros: «Dormía equí y too. Llevantábame a les siete la mañana o a les seis, porque taba hiperestimulada y porque amás tenía que cumplir con unes feches. Foi mui guai».
«Cuando compuse Música pa tornar páxaros dormía equí y too. Llevantábame a les siete la mañana o a les seis, porque taba hiperestimulada y porque amás tenía que cumplir con unes feches. Foi mui guai»
La tercer pata del so trabayu son los ensayos: «una cosa ye’l procesu de crear les canciones y otra ye la fase d’aprender yo la mi parte». Equí entemécese’l trabayu individual col colectivu, pero l’oxetivu ye «nun tener qu’ensayar xuntos toles selmanes y concentrar los ensayos». Nesti sen, Quintana matiza dos coses: «nun ye que seya vivir de rentes, ye que formámonos pa nun tener qu’ensayar toles selmanes» y «los ensayos nun se suelen pagar -Rodrigo Cuevas sí, pero’l resto los mortales non-». A esto último añade tamién qu’ella en Música pa tornar páxaros sí que pagó los ensayos al cuntar con unes «condiciones óptimes pa ello».
Dificultaes y incomprensión
Mui venceyao a esto último ta la incomprensión que padecen los artistes cuando «hai una gran parte del públicu que piensa que tú cobres namás pola hora que tas enriba l’escenariu» y entós ye’l momentu de poner les cifres enriba la mesa: «Ponte que pa un procesu creativu como’l de Working Class seyan 40 hores. Aparte, cinco díes d’ensayos con cinco hores cada día. Pon otra hora y media d’oficina namás pa coordinar esto. Dempués, el día del conciertu, vete al sitiu onde tengas que dir. Ponte que vamos a Turón: 45 minutos. Montaxe, nesti casu 40 minutos. Preba de soníu, otra hora aprox. Llueu una hora y cuartu de conciertu; media hora de desmontaxe y otros 45 minutos pa volver pa casa. Amás gastes en gasolina, merques unes botelles d’agua a tol equipu como mínimu… Si son les diez de la nueche vas pa to casa o si ye ente hores tienes que cenar nel sitiu». Como somos toes de lletres, nun echamos les cuentes; pero si queréis sabelo, garrái calculadora.«Vese namás la punta del iceberg del nuestru trabayu y tamos un poco señalaos. Hasta qu’eso nun cambie, vamos tener que tar xustificándonos o cobrando de menos, peleando’l salariu tol tiempu», añade a esta cuestión poniendo d’exemplu frases que manquen y que tien sentío como «ye que los artistes… si ye lo que te gusta, ¿por qué cobres d’ello?».
«Hai una gran parte del públicu que piensa que tú cobres namás pola hora que tas enriba l’escenariu. Vese namás la punta del iceberg del nuestru trabayu y tamos un poco señalaos. Hasta qu’eso nun cambie, vamos tener que tar xustificándonos o cobrando de menos, peleando’l salariu tol tiempu»
Pero más allá de señalamientos, Mapi Quintana afonda notru de los grandes pilancos de ser artista: la representación y intentar algamar conciertos. «Pa mí ye una barrera infranqueable porque yo nun sé vender, nun sé vender nada, pero a mí mesma menos tovía. Entos ¿Cómo voi dirixime a programadores? ¿Ónde acaba la humildá y entama’l vendemotos? Yo nun sé vender los puntos fuertes de lo que faigo». Por esta razón hai profesionales que se dediquen a ello en llabores como’l booking o’l management, pero ella nun dio tovía con nenguna axencia qu’asumiera’l so proyectu; y xestionar los “non” ye otra de les cuestiones más dures: «Cuando te dicen que non varies veces de siguío yá nun ye namás el propiu ego firíu, ye que ves que llaboralmente se te compliquen muncho les coses, pero claro, tengo 48 años, a estes altures ¿voi dedicame a otra cosa?». Venceyao a esto pon enriba la mesa la importancia que se-y da anguaño a les redes sociales y la sobredimensión que faen de too; torgando carreres por cuenta de nun tener X miles de siguidores. Ye más lleña pal fueu de la «inseguridá y la falta d’autoestima» a la qu’esta artista tien facer frente mentalmente.
«Cuando te dicen que non varies veces de siguío yá nun ye namás el propiu ego firíu, ye que ves que llaboralmente se te compliquen muncho les coses, pero claro, tengo 48 años, a estes altures ¿voi dedicame a otra cosa?»
Profesional y de l’Asturies Working Class
«Si quies vivir de la música n’Asturies tienes que ser autónomu, porque ye mui complicao tar a sueldu de naide. Y equí veo un problema gordísimu que ye que nun haiga un circuitu de música profesional, nel que temos metíes namás toles profesionales. La xente amateur siempre va tener una disponibilidá económica y de medios muncho menos esixente qu’un profesional y los que pagamos autónomos nun podemos competir con eso». A esta realidá amésta-y la reivindicación de que «gran parte de la vida cultural de les ciudaes ta nos chigres», pero que nestos espacios «los músicos trabayen ensin asegurar y nun pueden pagar un sueldu a naide». Por eso pide la implicación de l’alministración pa qu’«apoyen dafechu a esa xente que ta sacando alantre la vida musical de los conceyos durante tol añu -non namás cuando hai turismu-, faciéndose cargu de los medios y los gastos que necesiten», y pon l’exemplu d’Holanda, onde había polítiques públiques nesti sen.
«Un problema gordísimu ye que nun hai un circuitu de música profesional nel que temos metíes namás toles profesionales. La xente amateur siempre va tener una disponibilidá económica y de medios muncho menos esixente qu’un profesional, y los que pagamos autónomos nun podemos competir con eso»
Cuando fala d’estes cuestiones, Mapi saca la so cara más lluchadora. La pallabra «resistencia» ye verbalizada a esgaya nestes cuasi dos hores de conversación. Por eso nun ye casualidá que’l so próximu espectáculu lleve por títulu Asturies Working Class. Too surdió cuando l’artista sintióse representada al ver una camiseta con esi conceptu de Puru Remangu -marca a la qu’almira «por devolver a los asturianos l’arguyu»-. Entós reflexonó: «Yo soi fía, nieta, sobrina, compañera de clase… de mineros ¿Por qué nun toi cantando cantares de mineros y de la clase obrera en xeneral? Si ser clase obrera ye lo más». Asina ye como s’axuntó a Rubén Bada -que ye a quien tenía al llau na furgoneta- y entamó a preparar un repertoriu de cantares populares venceyaos a la clase trabayadora. Nél hai temes americanos -de Mercedes Sosa, Chico Buarque, Rubén Blades, Pedro Aznar…-; una “Suite de la Cuenca” inspirada en Nuberu; y hai intención de facer tamién temes propios: «Prestaríame cuntar les histories de mio pá cuando andaba corriendo delantre la Guardia Civil nes manifestaciones de los años 80. Creo que ye dalgo mui común en munches cases de Cuenca».
«Yo soi fía, nieta, sobrina, compañera de clase… de mineros ¿Por qué nun toi cantando cantares de mineros y de la clase obrera en xeneral? Si ser clase obrera ye lo más»
L’estrenu d’Asturies Working Class va ser el 15 de marzu nel pozu Santa Bárbara de Turón, un vieyu espaciu industrial reconvertíu pa la cultura. Tien tola llóxica del mundu. Pesie a los cambios sociales, siguimos siendo clase trabayadora. Camudamos picu por pandereta, pala por tecles; pero caltenemos la conciencia de clase intacta, puxando por esta otra industria que tanta materia prima tien pa picar: la cultura. Volvemos pa la oficina d’El Natahoyo cola sensación de que nun había meyor manera d’entamar esta estaya dedicada a les distintes persones que trabayen na industria musical asturiana.
.
Suscríbite a les nuestres novedaes
