6 RIALES – CD Sutripar

Sutripar ye’l primer discu de llarga duración de 6 Riales.

11 cantares formen esti discu nel que pue sentise «música tradicional asturiana con un aire distintu, con munchu raigañu pero sobre manera con lletres que busquen llegar a tol públicu», como presenta Elisabeth Montequín, componente d’esti tríu qu’une la so voz y percusiones a les de Alba Menéndez y Natalia Riestra. Del total de temes, cinco son de composición propia, amosando tamién la capacidá de la formación pa crear pieces nueves que tán «inspiraes siempre pola tradición y interpretaes a traviés de la percusión».

Xotes, romances, pasudobles, dances, rumbes, muñeires… dan forma a les pieces d’un discu que tamién puxa pol empoderamientu femenín: «La mayor fuente de la que bebe la nuestra música son les muyeres, les que tán y les que nun tán, y que nos dexaron un llegáu que nun pue desapaecer».

Cola publicación de Sutripar y el trabayu de 6 Riales esta herencia cultural caltiénse encesa.