BANDA GAITES LLACÍN – CD Resollu

Resollu ye’l tercer trabayu de la Banda Gaites Llacín. L’álbum ta formáu por doce temes que ponen un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior.

A lo llargo de 53 minutos y doce temes el discu percuerre temes tradicionales, d’autoría propia y versiones qu’axunten distintes llinies de soníu. Too ello con collaboraciones de pernomaos músicos d’Asturies que formen parte d’agrupaciones como Llan de Cubel, Felpeyu, Corquiéu o Tuenda, ente munches otres.

La Banda Gaites Llacín creóse en 1998 nel conceyu Llanes pente los escolinos de la Escuela de Música Tradicional. Nesti tiempu xiró per países como China o Estaos Xuníos; actuó nos principales festivales del xéneru y algamó reconocimientos y premios. El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies y, en delles ocasiones, fusiones musicales con pieces de los paises que formen l’Arcu Atlánticu.