BAXEL – CD ‘El Cantar del Simpatías’

‘El Cantar del Simpatías’ ye’l primer discu que’l guitarrista, bouzuquista y cantante Paul Balmori y el flautista y gaiteru Rigu Suárez -dambos miembros de Corquiéu-, publiquen baxo’l so nuevu proyectu musical: Baxel.

«Ye un discu que pretende rescatar y caltener vivu’l repertoriu tradicional de Ribeseya y la memoria de los sos informantes», comenta Rigu Suárez pa musicasturiana.com sobre los diez temes que dan forma al CD. Nesti sen, el músicu añade que «el repertoriu d’esti trabayu ta formáu nun 80% por temes tradicionales de Ribeseya, na so mayoría inéditos d’archivos propios y d’otros del ATOAM d’Ambás y Ramses, anque tamién aportaron archivos de collacios de Ribeseya».

La diversidá ye otra de les característiques del álbum. Suárez destaca que nel CD «hai munches Xiraldilles, baille mui propiu del conceyu, de calter y temática marinera» , amás de dances, xotes, alboraes, ramos, xotes, o aires, ente otros xéneros. Tamién hai espaciu pa melodíes propies y incluso pa la reinterpretación de partitures del sieglu XX: «Ficimos una recopilación de Xiraldilles del Cancioneru Torner que grabamos cuasi ensin modificar y rescatamos una partitura de 1915 del cupletista Juan Martínez Abades dedicada a la Marquesa d’Argüelles», añade’l flautista y gaiteru.

Nesti trabayu collaboren amás destacaos músicos del folk asturianu: Xosé Antón “Ambás”, Pepín de Muñalén, David Varela, Richar García, Josep María Ribelles y Sergio Rodríguez.