JOAQUÍN PIXÁN - Llibru-CD Diálogos

El tenor cangués Joaquín Pixán publica un trabayu onde afonda na so propuesta d’entemecer pieces del repertoriu tradicional con composiciones nueves que siguen les sos pautes y formes, pero con melodíes y testos orixinales dafechu. Esta entrega nueva del cantante lleva por títulu ‘Diálogos‘ y nél collaboren intérpretes como Luisa Martínez, Lorena Corripio, Patricia Pariente o Mariluz Cristóbal Caunedo y músicos como Manuel Pacheco (pianu), Nel Pérez (clarinete) o Martín Pérez (flauta). Nos testos tán presentes nomes bien conocíos de les lletres asturianes como Xuan Bello, Esther García o Aurelio González Ovies.

En ‘Diálogos’ Pixán esplora les posibilidaes espresives qu’ufierta la canción dialogada na asturianada, amás de presentar delles composiciones propies. Con esta obra sigue apostando por conxugar tradición y renovación de la mesma, col enfotu de facela avanzar y crear repertoriu nuevu. Ta editada pola Universidá d’Uviéu y según la nota de prensa:  «Les conversaciones qu’equí oyemos –escuchamos- adquieren traces renovaes de fondura colos diferentes arreglos musicales y testuales: la señardá ye más intensa, la separación más doliosa, l’allegría más ardiente y el recuerdu más frescu».