JUAN MENÉNDEZ MUÑIZ "JUANÍN DE MIERES" - Vinilu

Vinilu que recueye delles de les pieces más destacaes interpretaes por Juanín de Mieres.

Esbillamos equí un testu de l’asturianada.com dedicáu a esti cantador:

“Juan Menéndez Muñiz Juanín de Mieres, tamién conocíu como L’Almirante de la Canción Asturiana, o Juanín el Grillu, ñació en Mieres del Camín el 14 d’ochobre de 1905. Dende bien mozu comenzó a cantar tonada, aprendiendo música de manes d’una hermana profesora, y convirtiéndose na voz solista de la Capilla Sacra de Mieres, con malapenes dieciséis años. Poco depués ingresa nel Orfeón de Mieres, del que va vser la so figura más nomada a lo llargo de los siguientes trenta años.

La so voz pue sentise, arriendes de nuna bona parte de grabaciones, en películes como Marianela y Bajo las nieblas de Asturias. La mayor parte de les asturianaes por él grabaes son interpretaciones clásiques del xéneru, como “A la salida del Sella”, “Arrea carreteru”, “Amagostasti castañes”, “Ayer me dixo to padre”, “La vaca pinta”, “Cantar bien neña”, “Los xatiquinos”, “Tengo de subir al puertu”, “La portillera”, “Si qieres que te cortexe”, “Vaqueiras”, “Soi pastor”, “Si estimes el mio querer”…

Morrió nel añu 2002, cerrando cola so vida un ciclu y valiendo como referencia pa toles grandes voces de la última metada del sieglu XX”.