LUIS NUÑEZ Y LOS FOLGANZANES - CD 'Blinca'

Blinca’ ye’l tercer discu del proyectu pop-rock d’autor Luis Núñez y Los Folganzanes.

El periodista y xestor cultura Inaciu Galán presenta asina esti trabayu:

Luis Núñez y los Folganzanes tráinos un trabayu nuevu qu’apurre a la música asturiana un conxuntu de soníos bien prestosu y que nun va dexar indiferente a naide. En Blinca l’artista asturianu da un pasu más na so carrera con seguridá y anovando, mientres sigue calteniendo la esencia de la so obra.

En temes como Blinca, que da nome al discu, o La Fonte la Fisgona, apruz la versión más folk de Luis Núñez, con un soníu cuidáu y una bayurosa amuesa d’instrumentos del gran equipu de collaboradores del que s’arrodia esti músicu en cada trabayu.

Sicasí, la so faceta más interesante ye aquella na que lleva a la música asturiana y n’asturianu a campos menos visitaos, con soníos ente’l rock y el pop, la música de cantautor… y siempres cola voz personal d’un artista que tien al llombu una trayectoria llarga y variada, pero equilibrada, ensin estridencies.

Cada tema llega con lletres bien construyíes, dalgunes en collaboración, habitual en Núñez, con poetes asturianos, colos que trabaya de cerca pa crear los sos temes, que tienen tamién nes lletres una parte fundamental, y nel usu del asturianu, un compromisu a reconocer.

Quien conoz de cerca’l trabayu de Luis Núñez, como tengo la suerte de poder dicir, sabe que’l so estudiu de Xixón ye un espaciu nel que los cantares van faciéndose a fueu lentu, cola profesionalidá d’un espertu en soníu, el talentu d’un músicu de llarga esperiencia y el curiáu d’un auténticu artesanu de la música.

Visitalu nel estudiu y ver cómo medren los sos temes ye una esperiencia especial. Unu comprueba como tres llargues hores y xornaes de trabayu, una base acaba convirtiéndose nuna melodía y como esa melodía va evolucionando con aportaciones musicales que van sumándose, con lletres que van perfeccionándose, con igües dacuando imperceptibles pal oyíu menos educáu pero que dempués suponen una meyora bultable nel tema. Lo más paecío a esi trabayu ye’l de los artesanos, el de los escultores, que ven nuna piedra una figura qu’acaba por surdir tres tantu trabayu. Y asina lo fai Luis, pasu ente pasu, ensin priesa, pero ensin pausa, porque nun para.

Ver a Luis Núñez, amando los sos temes, creyendo n’ellos, pero siempres abiertu a les propuestes de les persones a les que mos pide conseyu, fala d’un artista talentosu y tamién intelixente y abiertu a otres visiones, de les que siempres ye quien a garrar lo meyor. Ver tou esi trabayu que fai, ver eses ganes y esa ilusión, esi compromisu asumíu col asturianu, presta pola vida. Y el resultáu fala por él solu, un discu escelente, que me paez un verdaderu “blincu” na carrera de Luis Núñez y los Folganzanes, y qu’espero que nesta Asturies postcuarentena, tenga los escaparates y la promoción de les instituciones que merez un trabayu d’esti altor.