NOSOTRESTRES – USB El son nos cantares de boda Vol. 1

El Son nos cantares de Boda vol. I ye’l primer trabayu del tríu nosOtrestres, formáu por Laura Ruiz, Mónica Vega y Candela Pidal.

El discu ta formáu por 17 pistes, siempres precedíes d’un fragmentu curtiu de la grabación orixinal. Nél pueden sentise dende sonoridaes más apegaes a la tradición bien con pandereta, panderos y voz o col acompañamientu d’una bandina, a arreglos más folkies.

El trabayu discográficu estructúrase siguiendo’l trescurrir de la celebración d’un casoriu, faciendo agrupaciones temátiques y poniendo enfásis nos personaxes que participan nel eventu. Asina, les cinco situaciones temporales que se contemplen son la ‘Llegada de las compañeras’, el ‘Camino a la iglesia’, la ‘Salutación a los recién casados’, el ‘Camino de la casa’ y ‘El transcurso del banquete’; caúna d’elles con temes asociaos, por les referencies nos sos testos, a distintes figures como la novia, los convidaos, los padrinos o la suegra.

Esti proyectu de nosOtrestres naz tamién del trabayu de campu del etnógrafu y mayestru, Fernando de la Puente Hevia, como principal compilador de la mayoría de los cantares, sacantes el ‘Tributo a Pandereteres de Fitoria’, sobre la melodía que-yos cantara Obdulia de Bimeda (Cangas) a Ambás y Ramsés y que vien polo tanto del Archivu de la Tradición Oral d’Ambás (ATOAM) y ‘La Buena Pro’ -tamién nomáu pol incipit ‘Después que la han comido’-, recoyíu nel añu 52 pol investigador americanu Alan Lomax en Arenas (Cabrales).

El soporte físicu del álbum, diseñáu por Antón Barquero, sigue’l formatu denomináu Digipack USB e inclúi un llibretu nel que apaez esta clasificación y toles lletres recopilaes, amás d’una memoria USB na que se puen atopar tolos temes.