XENTIQUINA – Llibru + CD Canciones pa la Xentiquina

Canciones pa la Xentiquina. Una selección sentimental de Nacho Fonseca ye un llibru-discu qu’axunta diez temes escoyíos de la obra musical de Nacho Fonseca, creador de los famosos coros d’escolinos Seliquín y Xentiquina y autor de la banda sonora de la infancia de delles xeneraciones n’Asturies.

Les canciones foron seleccionaes pol mesmu autor a partir de los sos recuerdos y emociones, tantos como, de xuru, espertaron nes neñes y nos neños que crecieron imaxinando l’asientu tocín de la moto de Pachín, esi cañicón que raspiaba’l cielu o aquel vieyu sultán qu’iguaba los conflictos xugando al parchís. Canciones escrites y interpretaes n’asturianu, enllenes de lluz y humor, y grabaes a lo llargo de tres décades en siete esitosos discos, lo qu’ayudó de manera fundamental a normalizar l’usu del asturianu y a promover la so tresmisión.

Completen esta nueva obra les ilustraciones de l’artista asturiana Bitxo, que s’encarga d’aportar, dende’l so propiu universu poéticu, color, tenrura y imaxe a les lletres de les canciones que se pueden escuchar nel CD incluyíu nel interior pa que, asina, el llegáu musical de Fonseca siga pasando de xeneración en xeneración.