Sorteamos una camiseta de “Pogu, Perréu y Pandereta”
Nel sortéu esclusivu pa xente asociao a L’Ensame de Musicasturiana.com d’esti mes de xunu regalamos una camiseta de Pogu, Perréu y Pandereta, de Puru Remangu. Esti llema púnxo-y nome a la playlist de Spotify d’esta marca -na que pue sentise una montonera bandes d’Asturies y na que MUSICASTURIANA.COM collaboramos cola escoyeta musical-, y llueu garró formatu físicu cola camiseta diseñada pola artista porruana Nieves González. Amás, pa les semeyes promocionales d’esta camiseta participaron Vane del grupu punk-hardcore Desaniciu (escena pogu); la intérprete de rap, trap y reggaeton Ácida (escena perréu); y Leticia Baselgas de L-R (escena pandereta).
La xente asociao a L’Ensame de musicasturiana.com nun tien que facer nada pa entrar nel sortéu. Por ser sociu/a yá tienen participaciones y el nome de la persona ganadora vamos anuncialu’l próximu xueves 9 a les 12h.
