Ganadores de les entraes p’Amosando
Yá tenemos nomes de les persones ganadores de les entraes p’Amosando. El sorteú ficímoslu a traviés de la web socialgest y les persones que ganaron una entrada doble pal Amosando d’esti domingu 22 de mayu son les de la imaxen. Dende musicasturiana.com vamos contactar con elles a traviés del corréu electrónicu pa da-yos tolos detalles y confirmar asistencia.
Esti domingu 22 a les 18h entama la edición 2022 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta grabación participen el grupu folk Baxel pa presentar el so discu ‘El Cantar del Simpatías’ y les pandereteres-fusión Algaire, que publicaron apocayá’l so primer trabayu ‘Coral y Maera’.
Baxel ye un dúu de folk de cámara formáu polos componentes de Corquiéu Rigu Suárez (whistle) y Paul Balmori (bouzuqui). Nel so primer trabayu, ‘El Cantar del Simpatías’ reellaboren pieces tradicionales de Ribeseya. Xiraldilles, dances, xotes, alboraes, ramos o xotes suenen ente les diez pieces que dan forma a esti discu.
Algaire ye una banda formada poles pandereteres y cantantes Loreto Suárez, Iratxe Espina, Carla Miranda y el guitarrista Juan Yagüe. ‘Coral y Maera’ ye’l so primer discu, nel que faen música tradicional fusionada con estilos contemporáneos como’l pop, rock, electrónica o la música llatina, p’asina averar los sones de raigañu a nuevos públicos.
-
ALGAIRE – CD ‘Coral y Maera’12,00€
Cola participación d’estos dos proyectos musicales nuevos -que son de los que más sonadía tán algamando dientro de la música’l país-, Amosando estrena una cuarta temporada que llega con novedaes: van ser dos conciertos/grabaciones, cola participación d’un total de cuatro grupos; l’escenariu vuelve a ser Les Naves d’El Natahoyo; y namás van tener invitación al eventu la xente asociao a L’Ensame de musicasturiana.com que gane los sorteos d’entraes.
Tres años y 18 artistes
Amosando nació en marzu de 2019 a idea de la plataforma musicasturiana.com. Nesti tiempu tocaron 18 artistes pa presentar les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla y Caldo y Os Rabizos. La suma de los videos de los conciertos algama más de 185.000 reproducciones en YouTube.
Estes actuaciones reflexen la calidá de la música fecha en llingua asturiana amás de la so diversidá, yá qu’estilos como’l pop, indie, electrónica, folk, tonada, canción d’autor y rock suenen nesta iniciativa realizada audiovisualmente por Javi Lueje y Rubén Álvarez y patrocinada nesta edición por Fundación Caja Rural de Asturias y col sofitu de la Fundación Municipal de Cultura y Educación de Gijón/Xixón.
